ISAIAH 51 - BUKUIT NE TILIL

Kigimiti Israel amu ibwati boisionikab Jehovah

¹ Oepcha it, okwek che osubi imanda, okwek che ocheng’e Jehovah: ogeer ruandet ne kigimoong’unenok eng’ waet, ak ogeer keringet ne kigibalunenok.

² Ogeer Abraham kwandang’wong’, ak Sara ne kisichok: amu kiaguur inendet ye kita komi inegei, ak aberur inendet ak abaraa.

³ Amu kagogaigai Jehovah Sion: kagogaigai komoswekyik tugul che kigemeto, ak kigoyai ong’atennyi koigei Eden, ak koyai surkwenennyi koigei mbaretab Jehovah; kinyorjin oloto boiboiyet ak kagasetab ge, koboto kongoi ak tienwogik che rurei komie.

⁴ Ogasa, ee bikyuk; oepcha it, ee, bororiennyu: amu mong’unena ng’atutiet, ak ayai kiruogennyu kotonon koek lapkeiyetab bik.

⁵ Negit imandanyu, kamong’ yetunennyu, ak koruokyi bik eunekyuk; igena ngegusiek, ak komang’u eunnyu.

⁶ Onyal kipsengwetisiek, ak ogeer ng’ony: amu betos kipsengwetisiek ko u iyeto, ak ositu ng’ony ko u ngoriet, ak begu ko u noto ichek che menyei oloto: ago bunjin koigeny yetunennyu, ama kigesu imandanyu.

⁷ Oepcha it, okwek che ongen imanda, bik che mi ng’atutiennyu mugulelwekwak: amoiywei chotisietab bik, amoarogense amu churisiosiekwak.

⁸ Amu amei ichek kiptorotiot ko u ngoriet, ak koamei ichek kutiet ko u kororik: ago bunjin koigeny imandanyu, ak kobunjin ibinwek tugul yetunennyu.

⁹ Ng’eet, ng’eet, ilaach kimnatet, ee, eutab Jehovah; ng’eet, ko u betusiek che bo keny, ibinwekab betusiek che bo keny. Tos ma inye ne kiitonaton Rahab, ne kiitoor maswetit?

¹⁰ Tos ma inye ne kiiteny nyanjet, beekab riret ne o; ne kiiyai riretab nyanjet koek oret ne landoe ichek che kigitiach?

¹¹ Ak koweegegei che bo Jehovah che kigitiach, ak kobwa Sion kotienonu; ak tebe metowekwak boiboiyetab koigeny: nyoru kagasetab ge ak boiboiyet, ak komwei arogenet ak tigenet.

¹² Ane, anendet ne agoigook: i ng’o, kot iywei chito ne meei, ak iywei weritab chi ne kiyaei koek suswot;

¹³ ak kiiutie Jehovah Yaindeng’ung’, ne kiito kipsengwetisiek, ak kolumda lumeiywekab ng’ony; ak iyweisiei kotugul, betut komugul, amu koromnatetab usindet ye chobegei si kong’emis? Mi ano koromnatetab usindet?

¹⁴ Kitiachi eng’ chokyinet luulenik che kigimut; ama meei, ama wendi keringet, ama rarjin amitwogik.

¹⁵ Amu a Jehovah Kamuktaindeng’ung’, ne awase nyanjet, si komoror mildaetab ge ne bo beek: kainennyi ko Jehovah ne bo lugosiek.

¹⁶ Ak kiande ng’alekyuk kuting’ung’, ak kiatugenen uruetab eunnyu, si kobiit amin kipsengwetisiek, ak alume lumeiywekab ng’ony, ak alenji Sion, I bororiennyu.

Kiwalei arogenet ne bunu Jehovah koek boiboiyet

¹⁷ Ng’eet, ng’eet, tonon, ee Jerusalem, ne kiiee kikombetab neregek che koromen che bo Jehovah eng’ eunnyi; kiiee tabetab kikombet ne bo terteriotet icholol.

¹⁸ Mami ne indochin inendet eng’ werik tugul che kisich; ama mi ne namoti inendet eut eng’ werik tugul che kiigui.

¹⁹ Kagobutyin tuguchuto aeng’u; ng’o anyun ne rirjinin? Kubernatet ak ng’emisiet, ak rubet koboto rotwetab chok; agoigoitoin ano anyun?

²⁰ Kagotanuiso weriguk, ruitos eng’ tabanwekab ortinwek tugul, ko u kenyelet ne mi mestet; nyiitotin ichek neregek che koromen che bo Jehovah, keretab kong’ ne bo Kamuktaindeng’ung’.

²¹ Kas anyun ni inye ne kinyalili, ak ko bogitot, ago ma eng’ divaik:

²² Mwaei Kiptaiyandeng’ung’ Jehovah, ak ko Kamuktaindeng’ung’, ne ng’alaldochin bikyik, ko u ni kole, Ogeero, kaaib eng’ eung’ung’ kikombet ne bo terteriotet, noto ko tabetab kikombet ne bo neregekyuk che koromen; ma iee agoi:

²³ Ak ande eutab icheget che inyalilin; che kilenji sobondang’ung’, Ng’uruge, si kobiit kesiirte: ak iite bateng’ung’ koigei ng’onyut, ak koigei oret, eng’ ichek che siirtoi.