ISAIAH 50 - BUKUIT NE TILIL

¹ Mwaei Jehovah ko u ni kole, Mi ano baruetab besietab komet, ne kiaone inendet? Anan kiaaldachok ng’o ne yaacha? Kigialdak amu yaitwogikwok, ak kigion komet amu bistaosiekwok.

² Kilya si mabiit chi ye kianyone? Kingaguurse ko ma biit chi ne wolu? Tos kigonwagit eunnyu kot ko maimuch kotiach? Anan matinyei kamuget ne asorune? Keero, atenyi nyanjet eng’ kergong’iennyu, ayae ainosiek koek ong’atet: boldos njirenikwak, ak kobek eng’ melelda, amu mami beek.

³ Alaakyini kipsengwetisiek tuuindo, ak atuge kuniok.

Kamang’unet ne imang’u Otwogindet Jehovah

⁴ Kigona Kiptaiyat Jehovah ng’elyepta ne bo icheget che kiginet, si kobiit anai ole agimititoi eng’ ng’alek inendet ne ng’etat: ing’eetisiei karonet age tugul, ing’eeta si kobiit agas ko u che kiginet.

⁵ Kigoyat Kiptaiyat Jehovah itinnyu, ak kima angelel, anan atuktochi batai.

⁶ Kiagochi kobir batennyu birik, ak agochi matang’wekyuk icheget che kiitut sumeek: ma aung’e togennyu tewernatet ak che sing’iljina.

⁷ Amu toreta Kiptaiyat Jehovah; ma alilan anyun amu noto: kiauuiit anyun togennyu koigei ruandet ne uui, ak angen ale malilani.

⁸ Negit inendet ne iityina imanda; kibortosi ak ng’o? Ngetononse tuwai: ng’o bunyondennyu? Ingonyo korikya.

⁹ Ogeero, toreta Kiptaiyat Jehovah; ng’o ne igikyina? Ogeero, osegitu ichek tugul ko u ngoriet; amei kiptorotiot.

¹⁰ Ng’o eng’ okwek ne iywei Jehovah, ne kase it kutitab otwogindennyi? Ne wendote mesundeito, ama tinyei lapkeiyet, ingomang’ kainetab Jehovah ak kotiiegei Kamuktaindennyi.

¹¹ Ogeero, okwek tugul che olaali mat, che ogermenege kegenganik: obunote liblibenetab mang’wong’, ak eng’ kwenutab kegenganik che kaolaal. Onyoru nito kobunu eunnyu; oruitosi eng’ arogenet.