ISAIAH 5 - BUKUIT NE TILIL

Kalewenetab mbaretab sabibuk ne maiyiei

¹ Ngatienji chamanennyu tiendo ne bo chamanennyu agobo mbarennyu ne bo sabibuk. Kitinyei chamanennyu mbaretab sabibuk eng’ tulwet ne ming’in ne akwai mising’:

² ak kibal keringet koyieme, ak koisto koik eng’ yoto, ak kominji ketik che kororon che bo sabibuk, ak koteech teekset ne koi eng’ kwenut, ak kobal kogeny ole kitue sabibuk eng’ yoto: ak kilen imuchi koi sabibuk, ak kii sabibuk che bo timin.

³ Ara anyun, ee, okwek che omenye Jerusalem, ak okwek bikab Juda, asaok ale oruokwa ak mbarennyu ne bo sabibuk.

⁴ Nee ne kita ta keyaei ne siirei, eng’ mbarennyu ne bo sabibuk, ne ma ayai? Amu nee anyun, ye kingalen yiei sabibuk, koi sabibuk che yaachen?

⁵ Ui anyun nguno; amwawok kit ne aitoi mbarennyu ne bo sabibuk: aistoi ng’otwennyi, si keam; abute irimennyi, si ketiech:

⁶ ak angem; ma kesabori, ama kesemberi; ago bitos katablelinik ak katok: ang’ate kogeny bolik si mata korobonji.

⁷ Mbaretab sabibuk ne bo Jehovah ne bo lugosiek ko gotab Israel, ak ketinnyi ne iboiboi inendet ko bikab Juda: ak kiigen kiruoget, ago ogeero, tumdaetab korotik; kiigen imanda, ago ogeero, rirek.

Bwa eng’ kanagik che inachi bich

⁸ Bwa eng’ ichek che ituitos gorik, ak mbarenik, kot ko ma komi boroindo, ak kebirjok omeny okwege kwenutab emet!

⁹ Mwaei Jehovah ne bo lugosiek, agase eng’ itikyuk, kole, Iman, kuberi gorik che chang’, agot che eechen che kororon, che mamenyei chi.

¹⁰ Amu yiei ekaisiek tamanu che bo mbaretab sabibuk, debeinik aeng’, ak koi keswekab homer, epah agenge.

¹¹ Bwa eng’ ichek che ng’eetos karon mising’, kocheng’at maiywek; che eeisei agoi kemoi kwen, kot kobogityo mising’!

¹² Ak ketubet ak kibugandet, ak sugutit ne ming’in ak ndurerut, ak maiyek, mi choto igorwekwak: ago maiiti ichek boisietab Jehovah, anan kobwat boisionikab eunekyik.

¹³ Kigeluul anyun bikyuk, amu kibetyi naet: ak barei rubet bikwak che konyitotin, ak barei melelda tuiyenywa.

¹⁴ Noto anyun, kigobarait oldab che kigobek, ak kigoseng’eng’ ne ma aechin ak kiy: ak chorjingei oloto teegistanywa, ak chang’indanywa, ak etunatenywa, koboto inendet ne igasegei eng’ kwenunywa.

¹⁵ Kinyeroti chito ne nyerat, ak kiming’ini chito ne o, ak kiabuchi konyekab icheget che ieetegei:

¹⁶ ago tororitu Jehovah ne bo lugosiek eng’ kiruoget, ak itabanat eng’ imanda Kamuktaindet, Inendet ne Tilil.

¹⁷ Yeityo koagetyo arekab kechir ko u eng’ ole cham koagete, ak koam toek ole kigometo che akwaen.

¹⁸ Bwa eng’ ichek che ichuutune ng’ogisto boroonik che bo buch, ak kochuutu tengekto ko u eng’ rogoetab karit:

¹⁹ che mwaei kole, Ingochakta inendet, kochokyi boisiennyi, si kobiit kegeer: ak ingorik konyo kiruogetab Inendet ne Tilil ne bo Israel, si kobiit kenai!

²⁰ Bwa eng’ ichek che kuure yaitiet mieindo, ak koguure mieindo yaitiet, che igeere mesundeito lapkeiyet, ak kogeer lapkeiyet mesundeito; che igeere ng’wanindo anyinyindo, ak kogeere anyinyindo ng’wanindo!

²¹ Bwa eng’ ichek che indogei kole ki ng’omen, ak kogeerei kolen utotin!

²² Bwa eng’ ichek che koromen koee divaik, ak murenik che kimen che buruchi maiyek.

²³ Che iityin kiptengekyot agobo tugukab kagaigaet, ak korebe imanda chito ne bo iman!

²⁴ Noto anyun, ko u ye beelei liblibenetab mat mobek, ak ko u ye igesu liblibenetab mat suswek che yaamnyotin, ko u noto kergeitu tigitikwak ak nunatet, ak kotogosta taptokwak ko u temburiek: amu kigoesio ng’atutikab Jehovah ne bo lugosiek, ak kosas ng’olyotab Inendet ne Tilil ne bo Israel.

Biret ne bunu Jehovah

²⁵ Kilalyo anyun neregekab Jehovah agobo bikyik, ak kiiyogoito eunnyi kogirinda ichek, ak kobir, ak kibotanso tulonok che mengechen, ak kiek muswekwak busagariek eng’ kwenutab ortinwek. Nganda u noto, ko ma istogei neregekyik, ago ta kochuulat eunnyi kora.

²⁶ Ak konamji barak songoliet koborji bororiosiek che looen, ak koititenji ichek kobwa eng’ tabanwekab ng’ony: ak ogeero, ruou kochogu:

²⁷ mabiitu eng’ ichek ne ng’etei anan ko ne ibuti; ama mi ne inuuchi, anan ne ruei; ama kitustusi birenet ne rategei, ama ng’etei tapsinietab kweonikwak:

²⁸ che ng’atiben kipchabonikwak, ak ko riigotin kwangokwak tugul; kirogendoi kelyekab mbartanyisiekwak koik che uuen, ak u cheptirokwak kipchurjuriet:

²⁹ u borisenenywa ne bo ng’etundo, borisendos ko u barnotikab ng’etunyik: ee, borisendos, ak konam luulenik, ak komut kochamegei, ama biitu chi ne soru.

³⁰ Ak komororji ichek eng’ betunoto ko u mororetab nyanjet: ak ngo keer chi emet, ogeero, mi mesundeito ak bichiindo, ak koimenit lapkeiyet eng’ bolikyik.