ISAIAH 49 - BUKUIT NE TILIL

Kuurset ne kigiguur Otwogindetab Jehovah ak boisiennyi ne kigiyogune

¹ Ogasa, ee ngegusiek; ak oeb it, okwek bororiosiek che omi ole loo; kiguura Jehovah koboch ami mo; kimwa kainennyu koboch ami moetab kamennyu:

² ak kigoyai kutinnyu koigei rotwetab chok ne ng’atib, kiung’ena uruetab eunnyi; kigoyaa aek irumet ne kigisit, kigoung’ena motiennyi:

³ ak kilenja, I otwogindennyu; ee Israel, ne kitororena.

⁴ Ago kiamwa ale, Kiabirtege buch, kiaboisie kimnatennyu buch, ak eng’ tangoita; ago iman, mi kiruogennyu eng’ Jehovah, ak mi yaaktaennyu eng’ Kamuktaindennyu.

⁵ Mwaei anyun Jehovah ne kimimia koboch ami mo aek otwogindennyi, si kobiit amutyi inendet Jakobo kogeny, ak kiyumji Israel inendet: (amu a konyitot eng’ taitab Jehovah, ak kagoek Kamuktaindennyu kimnatennyu:)

⁶ ee, mwaei kole, Kiy ne ming’in iegu otwogindennyu, si kobiit ing’eet bororiosiek che bo Jakobo, ak iweech che kigirib che bo Israel: agonin kogeny iegu lapkeiyetab Bororiosiek, si kobiit iegu yetunennyu agoi tabanwekab ng’ony.

Sorunetab Israel

⁷ Mwaei ko u ni Jehovah, katiagindetab Israel, ak ko Nenyi ne Tilil, inendet ne sasei bik, inendet ne wechei bororiet, ne otwogindetab bounik: Tun keerei laitorinik ak kong’eetyo; ak kogutung’so bounik; amu Jehovah ne kiyani, Inendet ne Tilil ne bo Israel, ne kilewenin.

⁸ Mwaei Jehovah ko u ni kole, Kiawolun eng’ betut ne chamaksei, ak kiatoretin eng’ betutab yetunet: ak aribin, ak agonin iegu arorutietab bik, si ilang’u emet, si igochi kobore borotosiek che kimi buch;

⁹ kolenjin ichek che ratotin, Omande; ak kolenjin che mi mesundeito, Obartege. Amisioti eng’ ortinwek, ak egu komoswek che tororen ole churat, ole kiagete.

¹⁰ Magasei rubet anan koam melelda; ama kobeelei ichek mat, anan kobir asista: amu indochin ichek inendet ne rire, imuti kobun kong’ikab beek.

¹¹ Ak ayae tulonokyuk tugul koek oret, ak kotororitu ortinwekyuk che eechen.

¹² Ogeero, bunu chu ole loo: ak ogeero, bunu chu murot ne bo katam ak cherongo; ak bunu chu emetab Sinim.

¹³ Otiense, ee kipsengwetisiek; ak oboiboitu, ee ng’ony; ak otiense, ee tulonok; amu kagogaigai Jehovah bikyik, ak korire bikyik che kiginyalil.

¹⁴ Ago kimwa Sion kole, kigometa Jehovah, ak kigoutiena Kiptaiyat.

¹⁵ Tos imuchi kwondo koutie lakwennyi ne chuchuni, kot ko marire werit ne kisichei? Ee, imuchi chuto koutie, ago mautienen.

¹⁶ Keero, kiasirjin rubeitab eunekyuk; mi tainnyu kotugul irimoiguk.

¹⁷ Igirgiri lagoguk; mandaenen ng’emiguk, che yain iguber.

¹⁸ Yot met ak igeer komoswek tugul: iyumigei chuto tugul, ak kobwanjin. Mwaei Jehovah kole, Ko u ye asobe, iman, ilaachi tuguchoto tugul ko u kit ne bo lelesta, ak igermenege ichek, ko u ye kermenigei mureret.

¹⁹ Amu mariigitu komosweguk che kigemeto, ak che kigoguber, ak emeng’ung’ ne kigeng’em, iman mariigityin bik che menyei, ak kolooegitu ichek che kiluguin.

²⁰ Tun igase komwaei lagoguk che isiche, ko kagobek alak, kolen, mariich olito eng’ ane: istowage si kobiit ameng’is.

²¹ Yeityo imwa eng’ muguleldang’ung’ ilen, Kisikwa ng’o chuto, amu kigobegunena lagokyuk, ak ami anege, ak kigeluula, ak aombenoti? Ak ng’o ne kiigu chuto? Keero, kigibagakta anege; kimi ano chuto?

²² Mwaei Kiptaiyat Jehovah ko u ni kole, Ogeero, atokyini eunnyu bororiosiek, ak aborji bik songoliennyu: si koganab weriguk, ak kimut tibiguk eng’ tigigoikwak.

²³ Ak koek laitorinik kwanisieguk che iguin, ak koek osotikab laitorinik kametwogiguk che iguin: kutung’jinin ichek kot koit togochikwak ng’ony, ak komel temburiek che mi kelyeguk; ak inai ile a Jehovah, maililandos ichek che igena.

²⁴ Tos kirebe ne kim tuguk che kiluul, anan kitiachi luulenik che kigiluul eng’ imanda?

²⁵ Ago mwaei Jehovah ko u ni kole, Kirebe che kimen luulenikwak, ak kitiachi tugul che kigiluulei, che bo che imuisei: amu kibortosi ak inendet ne borienen, ak asoru lagoguk.

²⁶ Ak abae ichek che usin borwekwak; ak kobogityo eng’ korotikwak, ko u ye bogiti chi eng’ divaik che leelachen: si konai bik tugul kole, a Jehovah yetindeng’ung’, ak ko katiagindeng’ung’, Inendet ne bo Kamuktaet ne bo Jakobo.