ISAIAH 48 - BUKUIT NE TILIL

Uuindab mugulelwekab Israel

¹ Ogas ni anyun, okwek, ee gotab Jakobo, che kimwaitoenok kainetab Israel, che kiobiitune beekab Juda; che oyostosi eng’ kainetab Jehovah, ak omwae Kamuktaindetab Israel, ago ma eng’ iman, anan ko eng’ imanda.

² Amu mwaei kole ki bo nganaset ne tilil, ak kotiiegei Kamuktaindetab Israel: kainennyi ko Jehovah ne bo lugosiek.

³ Kiamwaite tuguk che bo tai koboch keny; ee, kimong’une kutinnyu, ak kiabarte: kiayai achokyi, ak kiisulda.

⁴ Amu kianai ale uuin met, bo karnet kaating’ung’, bo sugunwet togeng’ung’;

⁵ noto anyun kiamwaun koboch keny; kiasib aborun ama isulda: si memwa ile, kiyaei kanamwennyu, ak king’atei kanamwennyu ne kigiwai, ak kanamwennyu ne kigitany, choto che king’atei chuto.

⁶ Kiigas nito; keer chuto tugul-o; ak okwek, ko tos momwaitoi? Kaaborun tuguk che leelach koboch nguno, agot tuguk che ung’otin, che tom inai.

⁷ Kitau keyaei nguno, ma boch keny; ak kitom igas agoi betuni; si memwa ile, Keero, kiangen.

⁸ Ee, kitom igas, ee kitom inai; ee kitom koyatak iting’ung’: amu kiangen ale iyae kaberberisiet ne o, ak kigiguurenen bistoindet koboch imi mo.

⁹ Agoitoi neregekyuk amu kainennyu, ak amuitoi agobo inye amu kalosunennyu, si magesun.

¹⁰ Keero, kaatililin eng’ mat, ago ma ko u feda; kaalewenin eng’ mat ne o ne bo nyalilda.

¹¹ Ayae amu kainennyu, amu kainennyu; amu kimuruonindoi ano kainennyu? Amagochini age torornatennyu.

¹² Oepcha it, ee Jakobo, ak Israel nenyu, ne kiaguur: a inendet; a ne bo tai, ak ko a ne bo let kogeny.

¹³ Ee, kilum eunnyu lumeiywotab ng’ony, ak kiito eunnyu ne bo tai kipsengwetisiek: ye aguur ichek, kotononso kibagenge.

Soru Jehovah Israel eng’ Kirus

¹⁴ Oyumge, okwek tugul, si ogas; ng’o eng’ ichek ne kigomwaita tuguchuto? Kigocham Jehovah inendet: yaei eng’ Babulon kit ne chamei, ak kotebe eunnyi Kaldeik.

¹⁵ Ane, ee anendet ne kiamwae; ee kiaguur inendet: kiamutu, ak borei inendet eng’ orennyi.

¹⁶ Orikya, ogas ni; tom amwa kiy eng’ ung’ot koboch keny; kiami koboch agoi; kagoyokta anyun Kiptaiyat Jehovah, ak Tamirmiriennyi.

¹⁷ Mwaei ko u ni Jehovah, katiangindeng’ung’, Inendet ne Tilil ne bo Israel: A Jehovah Kamuktaindeng’ung’, ne inetin ibor, ne indoun eng’ oret ne kanyol ibun.

¹⁸ Kita mie nda kigegas ng’atutikyuk! Kita igeitu kalyeng’ung’ ainet, ak koigei imandang’ung’ beekab nyanjet che mildogei:

¹⁹ Kita tenitu ng’aniek iyoteng’ung’, ak koigei lagoguk che kiisiche, chang’indab ng’aniek: kima kota kiistoi kainennyi anan keng’em eng’ tainnyu.

²⁰ Omande eng’ Babulon, omwee Kaldeik; obarte eng’ cheetab tiendo, omwaite nito, omwa kogasak agoi ole boch ng’ony: omwa ole, Kigotiach Jehovah Jakobo otwogindennyi.

²¹ Ma am melelda ichek ye kigimuti kobun ong’atosiek: kiigochi beek korootune ruandet konaga ichek: kibet ruandet kogeny, ak kitumgei beek.

²² Mwaei Jehovah kole, Mami kalyet eng’ kiptengeginik.