ISAIAH 47 - BUKUIT NE TILIL

Tiendab katerteret amu kabutetab Babulon

¹ Choruge ak itebe temburiek, ee inye ne i chepto ne bergeiyat ne bo Babulon; tebe ng’ony, ye mami ng’echeretab laitornatet, ee cheptab Kaldeik: amu ma keguurenen kogeny ne cheptalbisio ak ko ng’arng’ar.

² Nam koitab bai, ak ing’a bek: ng’any meting’ung’, ireegu ngorieng’ung’ ne koi, ng’any keldo, ak ilandae ainosiek.

³ King’anyin itebi ach ngor, ee, toogu tewernateng’ung’: ayaaktoi mugetut, amataache chi age tugul.

⁴ Katiagindennyo, kainennyi ko Jehovah ne bo lugosiek, Inendet ne Tilil ne bo Israel.

⁵ Tebi eng’ sisek, ak iwe mesundeito, ee cheptab Kaldeik: amu ma keguurenen kogeny Chebiosetab bountosiek.

⁶ Kianerekyi bikyuk, kiamuruon bortannyu, ak kiande ichek eung’ung’: ma irire agot kitigin; kiigesenji che kigoosegitu choging’ung’ ne nyigis mising’.

⁷ Ak kiimwa ile, Aegu chebioset agoi; kot ko mata inde tuguchuto muguleldang’ung’, amata ibwat kagesunenywa.

⁸ Kas nito anyun, inye ne ichame ureriosiek, ne imeng’isiei, ameiiti kiy, ne imwae eng’ muguleldang’ung’ ile, Anendet, ama mi age kobatena; matebye ko u mosok, ama begunena lagok:

⁹ ago chein tuguchuto aeng’ betunak, begu lagok, ak kobiit mosoknatet: bwanjinin ko nyiitotin, agot ngo chang’ orgoinatosieguk, ak ko ng’isiat ng’orsosieguk.

¹⁰ Amu kiimang’u sogornateng’ung’; kiile, Mami chi ne keera; kigomaasin ng’omnateng’ung’ ak naeng’ung’: ak kiimwa eng’ muguleldang’ung’ ile, Anendet, mami age kobatena.

¹¹ Nyonjinin anyun yaitiet; memuchi igirinde: ak ibutyinin bichiindo, memuchi iiste: ak kochein ng’emisiet, ne mengen.

¹² Tonon anyun nguno itinye ng’orsosiek, koboto chang’indab orgoinatosieguk, che kiibirtochige koboch ko i ming’in; ngo tos imuchi inyorune kelunet, ngo tos imuchi iterterisie.

¹³ Kiing’et eng’ chang’indab kiruogutiguk: ingotononso anyun ng’omotikab kecheik, ak keerikab kecheik, ng’omotikab arawet age tugul, kosorun eng’ tuguk che bwanjinin.

¹⁴ Keero, igeitu mobek; beelei mat; masorugei eng’ kimnatetab mat ne lalei; maegu nesek che kiyue, ama egu mat ne kitebe tainnyi.

¹⁵ U noto anyun tuguk che kiibirtochige: ombenoti ichek che kiyaei mung’aret koboten, koboch ko i ming’in, wendi age tugul komostanyi: mabiitu ne sorun.