ISAIAH 46 - BUKUIT NE TILIL

Kiboru ole terjindoi Jehovah Kamuktaindet ak kanamonikab Babulon

¹ Abuksei Bel, ing’uruksei Nebo; laei tiong’ik ak tuga kanamonikwak: kagiyai koek milet tuguk che kioiboti, lautiet eng’ che ng’etyotin.

² Ing’uruksei, abuksei tugul; ma imuch kola lautiet, ago kigeluul icheget.

³ Oepcha it, ee gotab Jakobo, ak tugul che ng’etunotin che bo gotab Israel, che kiageseni koboch ko kagisich, che kigigeseni koboch komi mo:

⁴ A inendet agoi osindo, ak agesenok agoi osich kalwalek: kiayae, ak ageseni, ee ageseni, ak asoru.

⁵ Orogendoa ng’o, ak oaechinena ng’o, ak oyaniena ng’o si kobiit kegergeitu?

⁶ Ichek che rong’u tahabu eng’ lolet, ak kogere feda ratilit, kosirei kitang’indetab tahabu, ak koyae tuguchoto kanamwet; ibutyin ng’ony ichek, ee, kutung’jin.

⁷ Ibe tigikyiet, laei, ak koteepto eng’ oldanyi, ak kotonon; ma keisto eng’ komostanyi: ee, rirjin age kioto, ama imuch kowol, anan kosor inendet eng’ nyalildanyi.

⁸ Obwat ni anyun, ak obartege ole o murenik: obwatyige kogeny, ee okwek bistoichu.

⁹ Obwat tuguk che bo tai che bo keny; amu a Kamuktaindet, ama mi age; a Kamuktaindet, ama mi age ne kegerge;

¹⁰ ne ibortoi kegesunet koboch taunet, ak kobortoi koboch betusiek che bo keny, tuguk che tomo koyaogis; kole, Tononi kiruogennyu, ak ayae tugul che achame:

¹¹ aguure taritiet ne amei banyek eng’ kong’asis, aguure kiruogindennyu kobun emet ne loo; ee, kaamwa, ak ayae kosulda; kiachob, ak ayai.

¹² Oepcha it, okwek che o nyigonen, che o looen eng’ imanda:

¹³ Aibu imandanyu korik, malooitu, amaigaegei yetunennyu: ak ande Sion yetunet agobo Israel ne torornatennyu.