ISAIAH 45 - BUKUIT NE TILIL

¹ Mwachin Jehovah Kirus, nenyi ne iilat, ne aname eunnyi ne bo tai, koterter bororiosiek eng’ tainnyi, ak atiach suenutikab laitorinik; si ayat kurgotik eng’ tainnyi, ama kigerei ormarichok, komwaei ko u ni kole;

² Andoenen, ak alitit komoswek che kunuren: atonatoni kereiywekab sugunonik che bo kurgotik, ak atil temeleiywek che bo karik:

³ ak agonin konoraikab mesundeito, ak magornatosiek che ung’otin che bo komoswekab ung’ot, si kobiit inai ile a Jehovah ne kiaguurin eng’ kaineng’ung’, Kamuktaindetab Israel.

⁴ Kiaguurin eng’ kaineng’ung’ amu Jakobo otwogindennyu ak amu Israel nenyu ne kialewen: kaataun kainet nganda tomo inaa.

⁵ A Jehovah, ama mi age; mami Kamuktaindet age kobatena: agermenin, nganda tomo inaa:

⁶ si kobiit konai ichek koboch ko kachor asis, ak koboch cherongo, kole mami age kobatena: a Jehovah, ama mi age.

⁷ Ayae lapkeiyet, ak ayae mesundeito; ayae kalyet, ak ayae yaitiet; a Jehovah, ne yaei tuguchuto tugul.

⁸ Osau, okwek kipsengwetisiek, ak ingorong’ bolik imanda: ingoyatak emet, si kobiit koib bolik yetunet, ak ingogochi imanda kobityo tugul; ane Jehovah ne kiayae noto.

⁹ Bwa eng’ inendet ne bortos ak Yaindennyi! Rokyet eng’ rokyonikab ng’ony! Tos mwachin menet inendet ne kimimii, kolenjin, Iyae nee? Anan tos mwaei boisieng’ung’ kole, Matinyei inendet eunek?

¹⁰ Bwa eng’ inendet ne lenjin kwandanyi, Iyie nee? Anan koteebe kwondo kolenji, Amin moet agobo nee?

¹¹ Mwaei Jehovah, Inendet ne Tilil ne bo Israel, ak ko Yaindennyi, ko u ni kole, Teebena agobo tuguk che bwanei; ong’ata agobo werikyuk, ak agobo boisietab eunekyuk.

¹² Kiayae ng’ony, ak kiatau ayai chito kotebe oloto: ane, ee, eunekyuk, che kiito kipsengwetisiek, ak kiang’at lugosiekwak tugul.

¹³ Kiang’eet inendet eng’ imanda, ak alititi ortinwekyik tugul: inendet ne teechei nganasennyu, ak kotiach bikyuk che kigimut, ma eng’ alet anan melekto, mwaei Jehovah ne bo lugosiek.

Weekyingei bikab bororiosiek Kamuktaindetab Israel

¹⁴ Mwaei Jehovah ko u ni kole, Nyonjinin boisietab Misri, koboto tugukab mung’aretab Etiopia, ak Sabeik, bik che koen, ak bunjinin; isubun; bwanjinin ko ratotin; ak kobutyi kelyeguk, kosomin, kole, Iman mi Kamuktaindet koboten; ama mi age, mami Kamuktaindet age.

¹⁵ Iman, i Kamuktaindet ne iunyege, ee, Kamuktaindetab Israel, Yetindet.

¹⁶ Ililandos, ee, toptobendos ichek tugul; toitos tugul che yaei kanamonik.

¹⁷ Ago soru Jehovah Israel eng’ yetunet ne bo koigeny: molilandosi anan otoptobense koigeny ak koigeny.

¹⁸ Amu mwaei Jehovah ne kitoi koyai kipsengwetisiek ko u ni kole, Inendet ko Kamuktaindet ne kimimii ng’ony ak koyai; kiigimit, kima yai koek buch, kiyai si kobiit kemeny: a Jehovah; ama mi age.

¹⁹ Tom ang’alal eng’ ung’ot, eng’ komostab emet ne bo mesundeito; ma alenji iyotetab Jakobo, Ocheng’a buch; amwae ane Jehovah imanda, amwae tuguk che litit.

²⁰ Oyumge obwa; origu tugul, okwek che kiochilile bororiosiek: matinyei naet ichek che ibei ketitab kanamwenywa ne kigiwai, ak kosaei cheptalelit ne maimuchi kosor.

²¹ Omwaite, obarte; ee, ingoruoch tugul: ng’o ne kiibor ng’olyondonito koboch keny? Ng’o ne kimwaita koboch keny? Tos ma ane Jehovah? Ama mi Kamuktaindet age kobatena; Kamuktaindet ne bo iman, ak ko yaindet; mami age kobatena.

²² Onyala, si kesoruok, okwek tabanwek tugul che bo ng’ony: amu a Kamuktaindet, ama mi age.

²³ Kiayosiechige, kagomong’une ng’olyot kutinnyu eng’ imanda, ama weechegei, ale, kutung’jina kutundo age tugul, iyostos ng’elyepta age tugul.

²⁴ Lenjina age, Mi eng’ Jehovah inegei imanda ak kimnatet: bwanjin bik inendet, ak kolilandos ichek tugul che kinerekyi inendet.

²⁵ Kiityin imanda iyotet tugul ne bo Israel eng’ Jehovah, ak kolosunegei.