ISAIAH 43 - BUKUIT NE TILIL

Katiaget ne kitiachi Israel ak boisiennyi ne kiyoktoe

¹ Ago mwaei anyun Jehovah ne kiyain ko u ni kole, Ee Jakobo, ak inendet ne kimimiin, ee Israel: kole, Ameiywei, amu kiatiachin; kiaguurin eng’ kaineng’ung’, i nenyu.

² Ami koboten ye ibune beek che chang’; ak ye ibune ainosiek, ko maimaluuchin; ye ibune mat, ko mabeelin; ama imelin liblibenetab mat.

³ Amu a Jehovah Kamuktaindeng’ung’, Inendet ne Tilil ne bo Israel, Yetindeng’ung’; kaagoite Misri koek ne kitiagenen, koboto Etiopia ak Seba.

⁴ Amu koiegu eng’ ane ne achame mising’, ak ne kigonyiti, ak kiachamin; agoitoi anyun bik agobo inye, ak agoite bik agobo sobeng’ung’.

⁵ Ameiywei; amu ami koboten: amutu iyoteng’ung’ eng’ kong’asis, ayumin inyo eng’ cherongo;

⁶ Amwachini murot ne bo katam, alenjini, Konu; ak amwachi murot ne bo tai, alenji, Ametuuch; omutu werikyuk kobun ole loo, ak omutu tibikyuk eng’ tabanwekab ng’ony;

⁷ age tugul ne kimwaitoe kainennyu, inendet ne kiatau ayai agobo torornatennyu; kiamimii; ee, kiayai.

⁸ Omutu bik che koriotin che tinyei konyek, ak omutu bik che ming’otin che tinyei itik.

⁹ Ingoyumgei bororiosiek tugul, ak ingoyumgei bik: ng’o eng’ ichek ne imuchi komwa ng’olyondonito, ak koboruech tuguk che bo tai? Ingomut baorinikwak, si kobiit kiityi imanda: anan ingogas, ak komwa kole, Bo iman.

¹⁰ O baorinikyuk, mwaei Jehovah, ak otwogindennyu ne kialewen; si kobiit onai ak oyana, ak oguiye ole a inendet; mami Kamuktaindet age ne kisib keyai eng’ ane, ama kobiitu age eng’ let.

¹¹ Ane, ee, anendet, a Jehovah; ama mi yetindet age kobatena.

¹² Kiamwaite, ak kiasoru, ak kiabarte, ama mi cheptalelit ne ter eng’ kwenung’wong’: o baorinikyuk anyun, mwaei Jehovah, ak a Kamuktaindet.

¹³ Ee, a inendet koboch agoi, ama mi age ne imuchi koreb eng’ eunnyu: aboisiei, ak ng’o ne imuchi koger?

¹⁴ Mwaei Jehovah, katiagindeng’wong’, Inendet ne Tilil ne bo Israel, ko u ni, kole: Kiayokte ng’olyot kwo Babulon agobo okwek, ak achooru ichek tugul ko u che mweoti, choto bo Kaldeik, eng’ melisiek che boiboitune.

¹⁵ A Jehovah, neng’wong’ Ne Tilil, Yaindetab Israel, Laitoriandeng’wong’.

¹⁶ Mwaei Jehovah, ne yaei oret eng’ nyanjet, ak oret eng’ beek che kimen;

¹⁷ ne moong’u karit ak mbartanyit koboto luget ak kimnatet; ruitos tugul ng’ony, ama ng’eetos kogeny; kagobetyo, kagimis ko u kitambit:

¹⁸ Amat obwat tuguk che bo tai, amat ogererji met tuguk che bo keny.

¹⁹ Ogeero, ayae kit ne leel; biitu anyun nguno; tos monae? Ayae oret eng’ ong’atet, ak ainosiek eng’ surkwen.

²⁰ Konyita tiong’ikab timin, lelwek ak tiong’ikab songolik: amu agonu beek eng’ ong’atet, ak ainosiek eng’ surkwen, si anaga bikyuk, chechuk che kialewen:

²¹ bik che kiayachige, si kobiit kobarta kalosunennyu.

²² Ago ma iguura, ee Jakobo; ago kiing’et agobo ane, ee Israel.

²³ Ma igetwa areguk koek kagochinoiguk che kibeelei; ama igonyitena tiseiyweguk. Ma abirjin iotisie kagochinoik, ama aiimenen tuguk che nyamdut.

²⁴ Ma ialunena feda tuguk che u mutwek che nyamdut, ama igona abiyo eng’ mwanikab tiseiyweguk: ago kiimena tengekwogiguk, kiigona ang’et agobo yaitwogiguk.

²⁵ Ane, ee anendet ne aistoi bistaosieguk, amu kainennyu; amabwati tengekwogiguk.

²⁶ Ibwatwa; ngeng’alal tuwai: tetu ng’aleguk, si kobiit kiityin imanda.

²⁷ Kiyai tengekto kwandang’ung’ ne bo tai, ak kiingelelja kaletoiguk.

²⁸ Amuruoni anyun bounik che bo ole tilil, ak ayae Jakobo koek ne chubot, ak ayae Israel koek ne kisasei.