ISAIAH 42 - BUKUIT NE TILIL

Kiboitiotab Kamuktaindet

¹ Ogeero otwogindennyu, ne agimiti; nenyu ne kialewen ne boiboitune sobondanyu: kande inendet tamirmiriennyu; ipchin kiruoget bororiosiek.

² Mabolei, anan kowaach, anan kotwek kot kegas kutinnyi eng’ oret.

³ Mairiei tegat ne chisot, ama imisi inendet kitambit ne iyeni: ibu kiruoget eng’ iman.

⁴ Matanui ama nyogoritu, agoi konde ng’ony kiruoget; ak kogen ngegusiek, ng’atutiennyi.

⁵ Mwaei ko u noto Kamuktaindet Jehovah, ne kitoi koyai kipsengwetisiek, ak koiito; inendet ne kiito ng’onyuni, ak che mong’une oloto; inendet ne igochin kabuset bik che menyei ng’ony, ak kogochi tamirmiriet ichek che bendote:

⁶ Kiaguurin, ane Jehovah, eng’ imanda, ak anam eung’ung’, ak aribin, ak agonin iegu arorutietab bik, iegu lapkeiyetab Bororiosiek;

⁷ iyat konyek che koriotin, imoong’u kimonjororinik eng’ korgoret, ak imoong’u che tebe mesundeito komong’une got ne kigiratyi.

⁸ A Jehovah; kainennyu noto: amagochini torornatennyu chito age, amagochini kanamonik che kiwaei, kalosunennyu.

⁹ Ogeero, kagosulda tuguk che bo tai, ak amwaitoi tuguk che leelach: amwawok kotomo kobiit.

¹⁰ Otienji Jehovah tiendo ne leel, otien kalosunenennyi koboch tabandab ng’ony; okwek che ochortoige nyanjet, ak tugul che mi orit, ngegusiek, ak bik che menyei oloto.

¹¹ Ingotienso ong’atet ak nganasokyik, nganasok che mengechen che menyei Kedar; ingotienso bik che menyei Sela, ingowaach eng’ tulonok barak.

¹² Ingogochi Jehovah torornatet, ak komwaita kalosunennyi eng’ ngegusiek.

¹³ Mandoi Jehovah ko u chito ne kim; ing’eeti neregek ko u chitab luget; bolei, ee waachei mising’; iborjin bunikyik kamugennyi.

¹⁴ Kiasis keny; kimayai kiy, ak aratge: awaache anyun nguno ko u kwondo ne machei kosigis; asiiru ak asienyi.

¹⁵ Ang’eme tulonok ak tulonok che mengechen, ak ayaam sogekwak tugul; ak awal ainosiek koek ngegusiek, ak ateny tamboinik.

¹⁶ Ak amutune kipkoratinik oret ne manaei; andochini eng’ ortinwek che manaei: awale mesundeito koek lapkeiyet eng’ tainywa, ak alitit komoswek che kunuren. Ayae tuguchuto, amabagaktoi.

¹⁷ Kiweektoi ichek koba let, ak kolilanso mising’, che imang’u kanamonik che kigiwai, che lenjin kanamonik che kigitany, O cheptalelisiekyok.

¹⁸ Ogas okwek che o ming’otin; ak ogosu, okwek kipkoratinik, si kobiit ogeerte.

¹⁹ Ng’o ne korat, kobate otwogindennyu? Anan ng’o ne ming’at ko u nenyu ne kiyoktoi ne ayoktoi? Ng’o ne korat ko u inendet ne kiting’ege kalyet, ak ko korat ko u otwogindetab Jehovah?

²⁰ Igeere tuguk che chang’, ago meguitosi; yatotin itikyik, ago magasei.

²¹ Kiibaibai Jehovah, kotoror ng’atutiet, ak koyai koek ne kigonyiti amu imandanyi.

²² Ago chu ko bik che kigiluul, ak kerebe tugukwak; kiginame ichek tugul keringonik, ak keung’e korgorosiek: kigoek che kiluulei, ama mi chi ne soru; kigoek che kiluule tuguk, ama mi chi ne len, Oweekte.

²³ Ng’o eng’ okwek ne chamei koepchi it nito? Ne chamei koeb it ak kogas agobo betusiek che bwanei?

²⁴ Kiigoito ng’o Jakobo keluul, ak kiigoito ng’o Israel kogochi rebik? Tos ma Jehovah? Inendet ne kigiyachi achek tengekto, ak ne kima cham ichek kobendate ortinwekyik, ama kas it ng’atutiennyi.

²⁵ Kirong’ji anyun neregekyik che koromen, ak kimnatetab luget; ak koyieme mat inendet, ago ma nai kora ak kobeel inendet, ago ma chut muguleldanyi.