ISAIAH 4 - BUKUIT NE TILIL

¹ Ak tun namei kwonyik tisabu muren agenge eng’ betunoto, kolenji, Kiame amitwogikyok, ak kilaachi ngoroikyok: ago ngeguurtoenech kityo kaineng’ung’; iste tewernatennyo.

Torornatetab Sion

² Kororonitu ak kotororitu eng’ betunoto temetab Jehovah, ak ko telunotin ak ko kororon logoekab emet eng’ ichek che kichililso eng’ Israel.

³ Ak tun kiguure ne itabanat inendet ne ng’etu eng’ Sion, ak inendet ne ng’etu eng’ Jerusalem, chito age tugul ne kigisir eng’ che soptos eng’ Jerusalem:

⁴ ye tun kagoundo Jehovah simdab tibikab Sion, ak koundo korotikab Jerusalem eng’ kwenunnyi eng’ tamirmirietab kiruoget, ak eng’ tamirmirietab beelset.

⁵ Ak koyai Jehovah boldet ak iyeto eng’ bet kouur meng’otet tugul ne bo tulwetab Sion, ak mat ne liblibeni, ak ne iluu kemoi: amu tuchei torornatet komugul kit ne kiuure.

⁶ Ak tun biitu emait ne tun kiuure bet eng’ kiptoret, ak koek ole kimwechin, ak ole kiung’egei eng’ usonet ne o ak ropta.