ISAIAH 39 - BUKUIT NE TILIL

Esioet ne kigiesio yamdaetab Juda ak Babulon

¹ Kiiyokyi eng’ betusiechoto Merodak-baladan weritab Baladen laitoriatab Babulon baronok ak kagochinet, Hesekia: amu kigas kole kiga komian, ak kigosob.

² Ak kibaibait Hesekia agobo tuguchoto, ak kiiborji ichek gotab tugukyik che bo kamanutiet ne o, feda, ak tahabu, ak nyamdutik, ak mwanik che kororon mising’, ak got tugul ne bo karikyik, koboto tugukyik tugul che konorotin: ma ng’et kiy eng’ gonnyi, anan eng’ bounatennyi, ne ma iborji Hesekia bichoto.

³ Kinyo anyun maotiot Isaia oldab laitoriat Hesekia, ak koteebe kolenji, Kale nee bichu? Ak kabunu ano kobwanei oling’ung’? Ak kile Hesekia, Kabwa olinnyu kobunu emet ne loo, emetab Babulon.

⁴ Kolenji anyun, Kageer nee eng’ gong’ung’? Ak kiwol Hesekia kole, Kageer tuguk tugul che mi gonnyu: mami kiy eng’ konoraikyuk ne ma aborji ichek.

⁵ Kolenji anyun Isaia Hesekia, Kas anyun ng’olyotab Jehovah ne bo lugosiek.

⁶ Keero, bwanei betusiek che tun kiibei tuguk tugul che mi gong’ung’ koba Babulon, koboto che kigonor kwanisieguk agoi ra: mami kiy ne ng’etu, mwaei Jehovah.

⁷ Ak komuti alak eng’ weriguk che mong’unenen, che isiche; ak koba koek ichek kiptainik eng’ gotab laitoriatab Babulon.

⁸ Kolenji anyun Hesekia Isaia, Mie ng’olyotab Jehovah ne kemwa. Kimwa kogeny kole, Amu mi kalyet ak imanit eng’ betusiekyuk.