ISAIAH 37 - BUKUIT NE TILIL

¹ Ak kingogas laitoriat Hesekia, kogerer ngoroikyik, ak kotugegei kuniok, ak kwo gotab Jehovah.

² Ak koyokto Eliakim ne kibou got, ak Sebna sirindet, ak boisiekab tisiik, kotugotegei kuniok, koba ole mi Isaia maotiot, weritab Amos.

³ Ak kilenji inendet, Kamwa Hesekia ko u ni kole, Betuni ko betutab nyalilda, ak keretab kong’, ak chubisiet: amu kait kesich lagok, ama mi kimnatet ne kesige.

⁴ Abere imuchi kogas Jehovah Kamuktaindeng’ung’ ng’alekab Rabsake, ne kagoyok laitoriatab Asuria kiptaiyandennyi, konyo kochot kamuktaindet ne sobei, ak koger kong’ ng’alek che kagas Jehovah Kamuktaindeng’ung’: ara anyun sa agobo bik che ng’etunotin.

⁵ Kobwa anyun otwogikab laitoriat Hesekia ole mi Isaia.

⁶ Ak kilenji Isaia ichek, Omwachini kiptaiyandeng’wong’ ko u ni, olenjini, Kamwa Jehovah kole, Ameiywei ng’alek che kegas, che kachubena otwogikab laitoriatab Asuria.

⁷ Keero, andoi inendet tamirmiriet, ak kasei ng’alekab bik, ak koweek kwo emennyi; ak agoite kebar eng’ rotwetab chok eng’ emennyi.

⁸ Koweek anyun Rabsake, ak koitita kobaregei laitoriatab Asuria ak Libna: amu kiga kas kole kikwa eng’ Lakis.

⁹ Ak kigas kemwaei agobo Tiraka laitoriatab Etiopia, kele, Kogonyo obarge. Ak kingogas koyokto bik koba oldab Hesekia, kolenji,

¹⁰ Omwachini Hesekia, laitoriatab Juda, olenjini, Amengoberberin Kamuktaindeng’ung’ ne imang’u, kolenjin, Magigoitoi Jerusalem kwo eutab laitoriatab Asuria.

¹¹ Keero, kiigas kit ne kiyachi laitorinikab Asuria emotinwek tugul, eng’ ng’emet ne king’em ichek koges: kesorun inye?

¹² Tos kisor ichek cheptalelisiekab bororiosiek, che kibar kwanisiekyuk, Gosan, ak Haran, ak Resep, ak lagokab Eden che kimi Telasar?

¹³ Mi ano laitoriatab Hamat, ak laitoriatab Arpad, ak laitoriatab nganasetab Separbaim, ne bo Hena, ak Iba?

¹⁴ Ak kinam Hesekia baruet eng’ eutab bik che kiga kiyok, ak kosoman: ak kitogosta Hesekia kwo gotab Jehovah, ak koiito baruanato eng’ taitab Jehovah.

¹⁵ Ak kisa Hesekia Jehovah kole,

¹⁶ Ee Jehovah ne bo lugosiek, Kamuktaindetab Israel, ne tebe kerubisiek, i Kamuktaindet, inye inyege, ne bo bounatosiek tugul che bo ng’ony; kiiyai kipsengwet ak ng’ony.

¹⁷ Eb it, ee Jehovah, ak igeer; ak kas ng’alek tugul che bo Senakerib, che kagoyok kochote Kamuktaindet ne sobei.

¹⁸ Iman, Jehovah, kigobar laitorinikab Asuria, emotinwek tugul, ak emenywa,

¹⁹ ak kigowirji ma kanamonikwak: amu kima ko cheptalelisiek, ago ki boisietab eunekab bik, ketit ak koik; king’em anyun ichek tuguchoto amu noto.

²⁰ Ara anyun, ee Jehovah Kamuktaindennyo, soruech eng’ eunnyi, si konai bounatosiek tugul che bo ng’ony kole i Jehovah, inye inyege.

²¹ Koyokto anyun Isaia weritab Amos chito kwo oldab Hesekia, kolenji, Kamwa Jehovah, Kamuktaindetab Israel, ko u ni kole, Ko u ye kaisaa agobo Senakerib laitoriatab Asuria,

²² ni ng’olyot ne kagomwa Jehovah agobo inendet: Kasasin bergeiyat cheptab Sion, ak kororechin kochotin; kagolelech metinnyi cheptab Jerusalem eng’ inye.

²³ Ak ng’o ne kiichot ak ichub? Ak ng’o ne kiibolji ak injurur? Noto ko Inendet ne Tilil ne bo Israel.

²⁴ Koichot Kiptaiyat eng’ otwogiguk, ak koile, Anyone kot aitu baragutab tulonok koboto chang’indab karisiekyuk, kot aitu orit eng’ Lebanon; ak aluul taragonikyik che koen, ak biribirinikyik che kororon: ak achute komosta ne toror mising’, osnetab mbarennyi ne rurei.

²⁵ Kiabal ak aee beek, ak ateny ainosiek tugul che bo Misri eng’ keldebesaikab kelyekyuk.

²⁶ Tom igas ole kiayaite ko u noto keny, ak ayai eng’ betusiek che bo keny? Ara kaasulde nguno, si kobiit ibut nganasok che ng’ototin koek karurugutik che kiging’em.

²⁷ Kiek anyun bik che kimenyei nganasochato, che tinyei kimnatet ne ming’in, kimeiyo mugulelwekwak ak kokwong’io; kiigei suswekab kewet, ak koigei sogek che ng’orng’or, ak koigei suswek che mi gorik barak, ak ko u mbaretab bek kotomo koeegitu.

²⁸ Ago angen kabuureng’ung’, ak mandaeng’ung’, ak nyonuneng’ung’ ne inyone go, ak neregeguk che koromen agobo ane.

²⁹ Amu neregeguk che koromen agobo ane, ak amu kogoit itikyuk loseng’ung’ ne bo ge, andoi anyun kombet serung’ung’, ak ande karnennyu kuting’ung’, ak aweechin ibun oret ne kebunu.

³⁰ Ak egu ni kaborunet ne kiborun: oame eng’ kenyini che bitos ichegei, ak oam eng’ kenyitab aeng’ che siegune choto; ak eng’ kenyitab somok, ogol, ak oges, ak omin ketikab sabibuk, ak oam logoekwak.

³¹ Ak bitos kogeny kobendi ng’ony tigitikab che ng’etu che chilildos che bo gotab Juda, ak koiyo logoek eng’ barak.

³² Amu mandoi eng’ Jerusalem che kang’et, ak chilildos eng’ tulwetab Sion: yaei nito kagiiletab ge ne bo Jehovah ne bo lugosiek.

³³ Mwaei anyun Jehovah agobo laitoriatab Asuria, kole, Maitu inendet nganasani, ama mwogei yoto eng’ kipchabet, ama nyonei tainnyi kotinyei long’et, ama wasyin ng’ung’unyek.

³⁴ Weegegei oret ne kibunu, ama itu nganasani, mwaei Jehovah.

³⁵ Amu aribe nganasani, asoru, agobo ane, ak agobo Daudi otwogindennyu.

³⁶ Ak kimanda malaikaiyatab Jehovah, ak kobar bik elfusiek bogol ak tamanwogik sisiit ak mut eng’ nganasetab Asuriek: ak kingong’eetyo bik karon, ogeero, ki muswek tugul, che kogobek.

³⁷ Kwo anyun Senakerib laitoriatab Asuria, koweek ak kwo komeny Ninebe.

³⁸ Ak ye kita kosaei eng’ gotab Nisrok kanamwennyi, kobar inendet werikyik Adramelek ak Sareser eng’ rotwetab chok: ak komwei koba emetab Ararat. Ak kilaitoran Esar-hadon werinnyi kogeer inendet.