ISAIAH 36 - BUKUIT NE TILIL

Kabogunetab Senakerib

¹ Ak eng’ kenyitab taman ak ang’wan ne bo laitoriat Hesekia, kobokyi Senakerib laitoriatab Asuria, nganasok tugul che ng’ototin che bo Juda, ak konam.

² Ak kiiyok laitoriatab Asuria Rabsake eng’ Lakis konyo Jerusalem oldab laitoriat Hesekia, koboto luget ne o, ak kitonone ole negite kererjetab tamboiyot ne bo meto eng’ oret ne o ne bo koretab mwetindet.

³ Yeityo konyo ole mi inendet Eliakim weritab Hilkia, ne ki ribindetab tugukab got, koboto Sebna sirindet, ak Joas weritab Asap sirindetab tuguk che biitu.

⁴ Ak kilenji Rabsake bichoto, Olenji Hesekia, Mwaei laitoriat ne o, laitoriatab Asuria, ko u ni kole, Nee kamang’unani omang’u?

⁵ Amwae ale, ng’alek buch kiruogutiguk ak kimnateng’ung’ ne bo luget: ng’o anyun ne imang’u kot ingelelja?

⁶ Keero, imang’u kiroktab tegandani kigeiri, noto ko Misri; ne ngot kotiiegei chi, kotoorei eunnyi: u noto Parao laitoriatab Misri eng’ tugul che imang’u inendet.

⁷ Ago ngot ilenja, Kimang’u Jehovah Kamuktaindennyo: ko tos ma inendet ne chechik komoswek che tororen ak kapkorosusiek che kigoisto Hesekia, ak kolenji Juda ak Jerusalem, Osae eng’ taitab kaptisisioni?

⁸ Ara anyun, asomin ale, igochi kit ne bo kayosiet kiptaiyandennyu laitoriatab Asuria, si agonin mbartanyisiek elfusiek aeng’, ngot imuchi eng’ komostang’ung’, inde bik che lanyei.

⁹ Imuktoi ano anyun igirinde kiptaiyat agenge eng’ otwogik che mengechen che bo kiptaiyandennyu, ak imang’u Misri amu karisiek ak bik che lanyei mbartanyisiek?

¹⁰ Ak tos katogosu kebarge ak emoni ang’em, ama mi kobota Jehovah? Kimwawa Jehovah, kolenja, Togoste obarge ak emoni ak ing’em.

¹¹ Komwachi anyun Eliakim ak Sebna ak Joa Rabsake kolenji, Asomin ale, ng’alalji otwogiguk eng’ kutitab Suria; amu kigase: mat ing’alalwech eng’ kutitab Yahudik, kogasei bik che mi irimet barak.

¹² Ago kile Rabsake, Tos kaiyokwa kiptaiyandennyu anyo oldab kiptaiyandeng’ung’ ak oldang’ung’, amwa ng’alechu? Tos ma iyokwa awa ole mi bik che mi irimet barak, si kobiit koam kobotok ng’atatekwak ak koee beekwak?

¹³ Kotonon anyun Rabsake, ak kobol eng’ kutit ne o eng’ ng’alekab Yahudik kole, Ogas okwek ng’alekab laitoriat ne o, laitoriatab Asuria.

¹⁴ Kole laitoriat, Among’ koberberak Hesekia; amu maimuchi kosoruok.

¹⁵ Amocham kong’atak Hesekia omang’u Jehovah, kole, Soruech iman Jehovah; magigochin nganasani eutab laitoriatab Asuria.

¹⁶ Amogas ng’alekab Hesekia: amu mwaei laitoriatab Asuria kole, Yai kalyet kobota, ak omong’u obwanja; ak ingoam chi age tugul eng’ okwek sabibukyik, ak ingoam chi age tugul logoekab mogoonikyik, ak koee chi age tugul beekab keringennyi:

¹⁷ agoi anyo amutak obe emet ne kergei ak neng’wong’, emet ne mi bek ak divaik, emet ne mi amitwogik ak mbarenikab sabibuk.

¹⁸ Oripge si maigaigaak Hesekia, kolenjok, Soruech Jehovah. Tos kigosor age eng’ cheptalelisiekab bororiosiek, emennyi eng’ eutab laitoriatab Asuria?

¹⁹ Mi ano cheptalelisiekab Hamat ak che bo Arpad? Mi ano cheptalelisiekab Separbaim? Ak tos kisor ichek Samaria eng’ eunnyi?

²⁰ Ng’o eng’ cheptalelisiek tugul che bo emotinwechu che kigosor emenywa eng’ eunnyu, kot kosor Jehovah Jerusalem eng’ eunnyu?

²¹ Ago kisisyo, ma wolji agot ng’olyo: amu kimwaei ng’atutietab laitoriat kole, Amat owolji kiy.

²² Kinyo anyun Eliakim weritab Hilkia ne ki ne kibou got, ak Sebna sirindet, ak Joa weritab Asap sirindetab tuguk che biitu, kobwa ole mi Hesekia ko kagogerer ngoroikwak, kobwa komwachi ng’alekab Rabsake.