ISAIAH 35 - BUKUIT NE TILIL

Kaberuretab bikab Jehovah

¹ Igasegei ong’atet ak turguito, ak kobaibait emet ne surkwen, ak koiye ko u taptet.

² Yiei mising’, ak kobaibait eng’ boiboiyet ak eng’ tiendo; kigochin torornatetab Lebanon, telunatetab Karmel ak Saron: keerei ichek torornatetab Jehovah, telunatetab Kamuktaindennyo.

³ Ogimit eunek che nyalulyotin, ogiil kutung’oik che ma kimen.

⁴ Olenji ichek che arogendos, Ogimegitu, amoiyweisie: ogeero, nyonei Kamuktaindeng’wong’ ak yaaktaetab mugetut, koboto kageeretab Kamuktaindet; nyonei kosoruok.

⁵ Koyatogis anyun konyekab che koriotin, ak koyatogis itik che timotin.

⁶ Yeityo kotoromben chito ne ing’wali ko u cheptirgichet, ak kotien ng’elyeptab ne namat kut: amu kutu beek eng’ ong’atet, ak kobiit kererusiek eng’ surkwen.

⁷ Ak koek ng’aniek che ilyeldos tamboiyot ak koek emet ne yaamat kong’ikab beek: ak eng’ meng’otetab lelwek, ole kiruitos ichek, kobiitune yoto suswek ak saoset ak cherungusiek.

⁸ Ak kobiit oret ne o eng’ oloto, ak oret, ak kiguure oranato Oretab Tililindo; mabunei oranato che muruonen ago bunjin bichoto; ama betos eng’ oranato kiprutoinik, agot ngo berber.

⁹ Mabiitu ng’etundo eng’ oloto, ama bunei oranato tiondo age tugul ne korom, maginyorjin oloto; ago bunei oloto che kigitiach:

¹⁰ ak koweek bikab Jehovah che kigitiach, ak kobwa Sion kotienonu; ak kotebe baragunywa boiboiyetab koigeny: nyoru kagasetab ge ak boiboiyet, ak komwei arogenet ak tigenoik.