ISAIAH 34 - BUKUIT NE TILIL

Kimwaei kiruoget agobo Edom eng’ taitab bororiosiek tugul

¹ Origu okwek bororiosiek, si ogas; ak oeb it okwek bik: ingogas emet, ak tuguk che nyiitat oloto; ng’ony ak tuguk tugul che mong’une.

² Amu tinyei Jehovah nyitatet agobo bororiosiek tugul, ak neregek che laldos agobo lugosiekwak tugul: kigong’em ichek koges, kigogoito ichek kebar.

³ Kiwirtoi bikwak che kigebar, ak buldos muswekwak, ak kochootyo tulonok amu korotikwak.

⁴ Ak kochoot luget tugul ne bo kipsengwet, ak kemaman kipsengwetisiek ko u kartasit: ak kowandagei lugenywa tugul, ko u sogot ne ibuti eng’ ketitab sabibuk, ak ko u sogot ne ibuti eng’ mogoiywet.

⁵ Amu kigoee rotwennyu bo chok eng’ kipsengwet kot konyi: ogeero, chorjingei Edom, ak chorjingei bik che kiachub, kiruokyi.

⁶ Nyiitat korotik rotwetab chok ne bo Jehovah, kigoakwait eng’ akwaindo, eng’ korotikab arekab kechir ak ng’ororek, koboto mwanikab soromok che bo mengichik: amu tinyei Jehovah tiseiywot eng’ Bosra, ak barisiet ne o eng’ emetab Edom.

⁷ Ak kochorgei soenik koboto ichek, kirugik che mengechen, koboto kirugik che eechen; ak kobogite emenywa korotik, ak koakwaitu temburiekwak eng’ akwaindo.

⁸ Amu betutab Jehovah ne bo yaaktaetab mugetut, kenyitab kageeret ne bo toiyetab Sion.

⁹ Ak kewal kererusiekyik koek manget, ak kewal temburiekyik koek koik che laldos, ak koek emennyi manget ne lalei.

¹⁰ Magimisi kemoi anan bet; togostoi iyetanyi koigeny: egu karatia koboch ibinda age agoi ibinda age; mabunei chi yoto koigeny ak koigeny.

¹¹ Ago bunjin chebokibabaa ak chepswererit; ak komeny oloto sugurut ak chepkugit: ak kochuul eng’ baragunnyi borowetab toiyet, ak borowet ne bo buch ne bo kalititisiet.

¹² Kuurei ichek bik che toogunotin kobwa bounatet, ago mabiitu chi eng’ oloto; egu buch bounikyik tugul.

¹³ Ak kobitye katok gorikyik che bo laitorinik, ak kobitye siwek ak katablelinik irimoikyik: ak koek meng’otetab lelwek, ak seremutab tiong’ikab songolik.

¹⁴ Ak kotuiyo tiong’ikab ong’atet ak suik, ak kowaach kwesta kowaakyi choruennyi; ee, tebe oloto sugurut ne bo kemoi, ak kosikyigei ole imuung’e.

¹⁵ Ak koteekyigei eng’ oloto sugurut ne o keswennyi, ak kolok, ak kogeeny, ak koyumji arekyik uruennyi: ee, iyumjingei oloto keerosiek, age tugul ak koget.

¹⁶ Ocheng’ eng’ bukuitab Jehovah, ak osoman: mabetei agot agenge eng’ chuto, mami ne rartae koget: amu kang’at kutinnyu, ak kagoyum ichek tamirmiriennyi.

¹⁷ Ak kigoser barbarek agobo ichek, ak kigopchechi ichek eunnyi eng’ borowet: bunjin ichek agoi, menyei oloto koboch ibinda age agoi ibinda age.