ISAIAH 33 - BUKUIT NE TILIL

Bwa eng’ ng’emindet ne ng’emei emet

¹ Bwa eng’ inye ne ing’emisiei, ama king’emin; ak ne iberberisiei, ama iberberin ichek! Ye ma ing’emisiei, keng’emin: ak ye ma iberberisiei, koberberin ichek.

² Ee Jehovah, rirenech; kigigenin: egu eunnyo karonet age tugul, ak iegu yetunennyo agine eng’ betutab nyalilda.

³ Mweei bik ye kas bolatetab wasetab ge; yestoi bororiosiek ye keng’eet.

⁴ Ak kiyumi barunenik ko u ye iyumisiei kutik: torombenjin ko u ye torombeni chereng’enyinik.

⁵ Toror Jehovah; amu menyei barak; kigonyiit Sion kiruoget ak imanda.

⁶ Tun biitu kimnatet eng’ betusieguk, ak oindab yetunet, ng’omnatet, ak naet: kaiyweisiet ne kiywei Jehovah ko konoruennyi.

⁷ Ogeero, waaktos eng’ sang’ bikwak che nyigonen: rirtos mising’ tononjinikab kalyet.

⁸ Kigelakta ortinwek che eechen, ma korutoi kiprutoiyot: kigobut kayomisutik, kigosas nganasok, ma koiiti chi.

⁹ Rirei emet ak konyaluli: ililani Lebanon ak koresei: u Saron ong’atet; ak boregei sok Basan ak Karmel.

¹⁰ Kang’eet anyun nguno, mwaei Jehovah; aeetu nguno; atororitu nguno.

¹¹ Omanachi metetek, oiyie mobek: kabuseng’wong’ ko mat ne igeswok.

¹² Ak kergeitu bik ak tartarik che kibeelei: ko u katok che kiluuli, che kibeelei eng’ ma.

Sorunet ne tun soru Jehovah bikyik

¹³ Ogas, okwek che o looen, kit ne kiayai; ak okwek che o negit, ong’any kamugennyu.

¹⁴ Iyweisiei kiptengeginik che mi Sion; kigonam botanet che maiywei Kamuktaindet: Ng’o eng’ achek ne imuchi komeng’is ak mat ne igesu? Ng’o eng’ achek ne imuchi komeng’is ak mat ne lalei koigeny?

¹⁵ Inendet ne wendote imanda, ak kong’alali che lititen; inendet ne sasei kelunetab sastaet, ne manamei tugukab kagaigaet, ne timei itikyik si magas agobo korotik, ak ne tuchei konyekyik si mageer yaitiet;

¹⁶ menyei inendet ole toror: oldanyi ole teegu ko irimoikab ruandosiek: kigochin amitwogikyik; mararjin beekyik.

¹⁷ Keerei konyeguk kororonindab laitoriat: keerei ichek emet ne kiuiitogei.

¹⁸ Ibwati muguleldang’ung’ agobo kamuiset: mi ano inendet ne iitisiei, mi ano inendet ne kerei karogendoetab aisurut? Mi ano inendet ne iiti teeksosiek che koen?

¹⁹ Megeere bik che koromen, bik che baroen mokwekwak che memuchi iguiye; bik che ng’alali kutit ne too ne memuchi iguiye.

²⁰ Keer Sion, nganasetab igorwekyok che kiging’at: tun keerei konyeguk Jerusalem, meng’otetab kamuung’et, emait ne magiutoi, ne magitutu tigongenikyik agoi, ama ng’etos boroonikyik.

²¹ Ago tun tebyei Jehovah kobotech eng’ oloto eng’ etunatennyi, oldab ainosiek che baroen ak kererusiek; ole mabunei moingetab beek ne kikwerie eng’ mugangok che kiwase beek, ama bunei yoto melit ne kararan.

²² Amu Jehovah ko kiruogindennyo, Jehovah ko ne konech ng’atutik, Jehovah ko laitoriandennyo; inendet ne soruech.

²³ Kagitustus borooniguk; ma imuch kogimit kelutab toloitab melinywa: ma imuch koiito angetab melit: kopcheak anyun barunenikab tuguk che chang’ che kigiluul; kinam che ing’waldos barunenik.

²⁴ Ak ma tun mwaei ne meng’isiei kole, Amiani: kinyochin kaat bik che menyei oloto, tengekwogikwak.