ISAIAH 32 - BUKUIT NE TILIL

Kaberuret ne nyonei eng’ kenyisiek che bwanei

¹ Ogeero, laitorani laitoriat eng’ imanda, ak kobounis bounik eng’ kiruoget.

² Ak egu chito ole kiung’ege eng’ usonet, ak eng’ usonet ne o; ko u ainosiekab beek eng’ ole yaamat, ko u uruetab ruandet ne o eng’ emetab ng’etatet.

³ Ama kigerei konyekab icheget che keertoi, ak kogasta itikab icheget che kastoi.

⁴ Ak koguiyo naet agichek mugulelwekab icheget che sartaisiei, ak kong’alalso komie ng’elyebwekab che uuen kutuswek.

⁵ Ma keguure kogeny chito ne berber, chito ne toogunot, anan keguure rebindet ne aiyeb.

⁶ Amu ng’alali ne berber kaberberisiet, ak koyai muguleldanyi tengekto, kochombilis, komwa ne ya agobo Jehovah, kometo buch sobondo ne amei rubet, ak koete koee ne amei melel.

⁷ Yaachen tuguk che bo rebindet: chobei chobutik che yaachen si kobare che taloen ng’alek che bo lembech, agot ye ng’alali ne matinyei kiy ng’alek che lititen.

⁸ Ago chobei ne toogunot, tuguk che toogunotin; ak tebyei eng’ tuguk che toogunotin.

Kateunet ne kiteechin kwonyik

⁹ Ong’eetye okwek kwonyik che omuunyi, ak ogas kutinnyu; oepchi it ng’alekyuk okwek tibik che moribege.

¹⁰ Amu kinyalilok eng’ betusiek alak ko kagosiirto kenyit, okwek kwonyik che moribege: amu betei ruratetab sabibuk, mabiitu kesisiet.

¹¹ Obotanse okwek kwonyik che omuunyi; onyalilye, okwek che moribege; oreegu ngoroik, ak otebi ach ngor, ak ogermenege kuniok.

¹² Luchei tegetik korirjin mbarenik che kororon, korirjin ketikab sabibuk che korurtos.

¹³ Bitos katok ak katablelinik eng’ emetab bikyuk; ee, eng’ gorik tugul che bo boiboiyet eng’ nganaset ne kobaibai:

¹⁴ Amu kibagaktoi gotab laitoriat; kiue nganaset ne mi bik che chang’; bunjin koigeny tulwet ak teekset ne koi ne kitobendoe, koegu kebenonik ole boiboitune sigirok che bo timin, ak koek ole agete kechirek;

¹⁵ agoi kerong’wech tamirmiriet eng’ barak, ak koek ong’atet mbaret ne rurei, ak kiroge mbaret ne rurei, osnet.

¹⁶ Komeny anyun kiruoget ong’atet, ak kotebe imanda mbaret ne rurei.

¹⁷ Ak koek boisietab imanda kalyet; ak kobiitune imanda kamuung’et ak kamang’unet koigeny.

¹⁸ Ak kotebe bikyuk meng’otetab kalyet, ak eng’ meng’otosiek che ribotin, ak eng’ komoswek che kimuung’e ole sisat.

¹⁹ Ago roboni koikab ropta kot kolul osnet; ak kolul nganaset tugul.

²⁰ Oberurotin okwek che ogole tabanwekab beek tugul, che iyoktoi kelyekab eito ak che bo sigiriet.