ISAIAH 31 - BUKUIT NE TILIL

Berberindo ne kimang’u Misri ak Asuria ne kata kimang’u Jehovah

¹ Bwa eng’ ichek che chorjingei Misri kocheng’ei toretet, ak kotiiegei mbartanyisiek; ak komang’u karisiek, amu chang’, ak komang’u bik che lanyei mbartanyisiek, amu kimen kot; ago mainyali Inendet ne Tilil ne bo Israel, ama cheng’ei Jehovah!

² Ago ng’om inendet agine, ak ibu yaitiet, ama walei ng’alekyik: ago ng’eetei kogirindoi gotab yaikab yaitiet, ak toretetab icheget che yaei tengekto.

³ Ago bik Misrik, ma Kamuktaindet; ak banyek mbartanyisiekwak, ma tamirmiriet: ak ye chuul Jehovah eunnyi, keriichei inendet ne toretisiei, ak ibuti ne ketoreti, ak kobutos tuwai.

⁴ Amu mwaei Jehovah ko u ni kole, Ko u ye boriseni ng’etundo ak ng’etundo ne barnotiot, agobo tiondo ne kagobar, agot ngeguur mestowek che chang’ koawenji inendet, ko maarogeni eng’ waaganywa, anan koming’injigei bolatenywa: chorugei ko u noto Jehovah ne bo lugosiek koyai boriet eng’ tulwetab Sion ak eng’ tulwennyi ne ming’in.

⁵ Ko u ye tirirendos taritik, ko u noto ribei Jehovah ne bo lugosiek Jerusalem; ribei ak kosoru, siirtoi kowendi koribei.

⁶ Oweekyige inendet ne kiongelelji mising’, ee lagokab Israel.

⁷ Amu tun wirtoi chi age tugul eng’ betunoto kanamonikyik che bo feda, ak konamonikyik che bo tahabu, che kiyaiywok eunekwok koek tengekto.

⁸ Ibuti anyun Asuriaindet eng’ rotwetab chok, ma rotwetab chi; ak kobar inendet rotwetab chok, ne ma bo bik: ak komwee rotwetab chok, ak koek murenikyik otwogik.

⁹ Ak komwei ruandennyi amu kamuiset, ak kotoptobenso bounikyik amu songoliet ne kageer, mwaei Jehovah ne mi mannyi Sion, ak komi mannyi ne o Jerusalem.