ISAIAH 30 - BUKUIT NE TILIL

Bwa eng’ Israel amu kinamgei ak Misri

¹ Bwa eng’ lagok che ngelel, mwaei Jehovah, che tilei ng’alek, ama eng’ ane; ak che tuchegei, ama eng’ tamirmiriennyu, si kobiit kotes tengekto eng’ tengekto:

² che ng’eetos kochorjingei Misri, ama teebena; che igimitegei kimnatetab Parao, ak komang’ uruetab Misri!

³ Egu anyun kimnatetab Parao kolilaneng’wong’, ak koek kamang’unet ne omang’u uruetab Misri, toiyeng’wong’.

⁴ Amu mi bounikyik Soan, ak kagobwa tononjinikyik Hanes.

⁵ Ililandos tugul agobo bik che maimuchi konyorune kiy, che ma toretet, anan ko kelunet, ago egu kalilanet, ak chotisiet agine.

⁶ Lautietab tiong’ik che bo Murot ne bo Tai. Ibe magornatosiekwak tigigoikab moekab sigirok, ak koibe konoraikwak ukwekab tambesik, koipchin bik che manyorune kiy, kobunei emetab nyalilda ak ndara, ole bunu ng’etundo ne kotoy, ak ne kirgit, erenet ak erenet ne tirireni, ne u mat.

⁷ Amu toretisiei buch Misri, ama tilei kiy toretonoto: kiaguure anyun inendet Rahab ne tebyei kosisei.

⁸ Ui anyun nguno, ak isirji bukuit, si kobunji betusiek che bwanei che bo koigeny ak koigeny.

⁹ Amu icheget ko bik che ngelel, lagok che bo lembeita, lagok che machamei kogas ng’atutietab Jehovah:

¹⁰ che mwachin keerik kolenji, Amogeer; ak kolenji maotik, Amomaotenwech tuguk che bo iman, omwawech tuguk che tangus, omaoten kaberberisiosiek:

¹¹ oistege eng’ oret, omaste eng’ oret, ogochi Inendet ne Tilil ne bo Israel kosis eng’ tainnyo.

¹² Mwaei anyun Inendet ne Tilil ne bo Israel ko u ni, kole, Amu osase ng’olyondoni, ak omang’u sastaet ak kamaaset, ak otiiege choto;

¹³ kergeitu anyun tengegito eng’ okwek ak ole kigong’eer ole negit kobut, ne kogotoorgei eng’ inatut ne koi, ne luulei kochokyin.

¹⁴ Ak kotui ko u ye kituei teretab cheptereniot, ne tuatui ko marire; kot ko ma kenyoru rokiet ne kiibe mat eng’ kapkoima, anan kerame beek eng’ keringet.

¹⁵ Amu komwa Kiptaiyat Jehovah, Inendet ne Tilil ne bo Israel, ko u ni kole, Kisoruok ye oweege ak omuuny; egu kimnateng’wong’ sisek ak kamang’unet: ago ma ocham.

¹⁶ Ago kiomwa ole, Achicha, kimwee mbartanyisiek; omweei anyun: ak kiole, Kilanye che chepcheb; chepchebitu anyun agichek che onok.

¹⁷ Mwee elfut agenge keretab kong’ ne bo agenge; omwee keretab kong’ ne bo mut: agoi kebagaktak oige ketit ne koi ne mi tulwet barak, oige songoliet ne mi tulwet barak.

¹⁸ Igenok anyun Jehovah, si kobiit koboruok mieindo, ak koek anyun inendet ne itororot, si kobiit korirenak: amu Jehovah ko Kamuktaindetab kiruoget; iberurotin tugul che igeni inendet.

Betusiek che iberurotin che mi tai che bo Israel

¹⁹ Amu menyei bik Sion eng’ Jerusalem: ma irire kogeny; iborun iman mieindo ye kas rireguk; ye kas kowolun.

²⁰ Nganda konok Kiptaiyat amitwogikab nyalilda ak beekab usisiet, ko ma keunyei konetiguk agoi, ago keerei konyeguk konetiguk.

²¹ Ak igas ng’olyot ne mi let eng’ inye, ne mwaei kole, Oret ni, oba orani; ye komaste obe eutab tai, ak ye komaste obe eutab katam.

²² Ak omuruon kit ne kigiliige kanamoniguk che bo feda che kigiwai, koboto che kigiliige kanamoniguk che bo tahabu che kigitany: iwirtoi ko u kit ne mi simdo; ilenjini, Istege eng’ yu.

²³ Ak koyok inendet ropta ne bo kesweguk, si kobiit igolse; ak kogonok amitwogik che bunu ruratetab emet, ak konerio ak kochang’ait: tun agete tuguk ole baraa eng’ betunoto.

²⁴ Amei eik agichek ak moekab sigirok che ibatisiei, amitwogik che anyiny che kigigonor, che kigirue aterut ak keibet.

²⁵ Ak kobiitu ainosiek ak kererusiek che mi beek eng’ tulwet age tugul ne o ne koi, ak eng’ tulwet age tugul ne ming’in ak ko toror, eng’ betutab barisiet ne o, ye ibutos teeksosiek che koen.

²⁶ Kogeny, kogergeitu lapkeiyetab arawet ak ne bo asista, ak kotesak lapkeiyetab asista konyil tisab, koigei lapkeiyetab betusiek tisab, eng’ betut ne inyai Jehovah mookab bikyik, ak kosoob birutikab kaguotenenywa.

Ng’emisiet ne king ’emei Asuria

²⁷ Ogeero, bunu kainetab Jehovah ole loo, lalei eng’ neregekyik, ak eng’ iyeto ne o ne togostoi; nyiitat kutinnyi nyitatet, ak u ng’elyeptanyi mat ne beelsei:

²⁸ ak u kabusennyi kererut ne mi beek che ing’irtogei, che itei kaatit, si kobiit kochuchugan bororiosiek eng’ kipchuchugetab ng’emisiet: ak kirate kutuswekab bik karnet ne imaasi.

²⁹ Onyoru tiendo ko u eng’ kemout ye kiyaei igorta ne tilil; ak kagasetab ge ne bo muguleldo, ko u ye ibei chito ndurerut si kwo tulwetab Jehovah, agoi Ruandetab Israel.

³⁰ Ak koyai Jehovah kutinnyi ne bo torornatet kogasak, ak kobor eunnyi ne choru, eng’ nyitatetab nereknatennyi, ak liblibenetab mat ne beelsei, koboto cheet, ak usonet ne o, ak koikab ropta.

³¹ Amu kitonatoni Suriek eng’ twegunetab Jehovah, ne birei eng’ kirokto.

³² Ak biret age tugul ne kiging’at, ne bire Jehovah inendet, komi koboto sugutisiek che mengech, ak ketubosiek: ak koborio koboto ichek eng’ lugosiek che kitumdumi.

³³ Amu kigechob Topet koboch keny; ee, kigechopchi laitoriat; kigoyai kolooit kwo ng’ony ak kotebeesit: karurugutiennyi ko mat ak kwenik che chang’; inaami kabusetab Jehovah, ne kergei ak koik che laldos, che isururu.