ISAIAH 3 - BUKUIT NE TILIL

Ye kima komi bounatet eng’ Juda

¹ Ogeer anyun-o, istoi Kiptaiyat, Jehovah ne bo lugosiek, eng’ Jerusalek ak Juda, tiieywot ak tuguk che kimang’u, koboto amitwogik tugul, ak beek tugul;

² koboto chito ne kim, ak chitab luget; koboto kiruogindet, ak maotiot, ak chito ne ng’orsei, ak boiyot;

³ koboto kiptaiyatab bik konom, ak chito ne konyitot, ak kiruogindet ak musogindet ne ng’om, ak kipsogeiyot ne ng’om.

⁴ Ak agochi lagok koek bounikwak, ak koboi ichek manyurunik.

⁵ Ak tun kiusei bik, usei age age, ak kous age tugul chitab kokwennyi: ak kosas lakwa boiyo, ak kosas chito ne nyerat chito ne konyitot.

⁶ Ye tun nam chi ng’etab kamet eng’ gotab kwandanyi, kolenji, Egu bounindennyo, amu itinye ngoroik, ak kotebe ng’emisioni eung’ung’:

⁷ mwaei inendet eng’ betunoto kole, Maegu kanyaindet; amu mami gonnyu amitwogik anan ngoroik: moeeta aek bounindetab bik.

⁸ Amu kogong’emak Jerusalem, ak kogobut Juda: amu kongelelji Jehovah eng’ ng’elyebwekwak ak eng’ boisionikwak, kotach konyekab torornatennyi.

⁹ Baorianjin ichek togochikwak; ak komwaitoi tengekwogikwak ko u Sodom, maunyei. Bwa eng’ sobonwekwak! Amu kagoyaakyigei yaitiet.

¹⁰ Omwachi ne bo iman olenji, mieitu eng’ inendet: amu amei ichek logoekab boisionikwak.

¹¹ Bwa eng’ kiptengekyot! Yaitu eng’ inendet; amu kigochin melektab boisionikab eunekyik.

¹² Usei lagok bikyuk, ak koboi kwonyik ichek. Ee bikyuk, konin ichiliil bik che indoun, ak kong’em bandab ortinweguk.

¹³ Tononi Jehovah kong’alaldowok, ak kotonon koruokyi bik.

¹⁴ Chutei Jehovah kiruoget, koruokyin boisiekab bikyik, ak bounikab bikyik: ak kolenji, Okwek che kioam mbaretab sabibuk; mi gorikwok barunenikab kibananok.

¹⁵ Lyon anyun, si osastoe bikyuk, ak otiech togochikab kibananok? Mwaei Kiptaiyat, Jehovah ne bo lugosiek.

Katalbisetab tibik eng’ oret ne ma nyolu

¹⁶ Kimwa kogeny Jehovah kole, Amu menioti tibikab Sion, ak kobendoti ko chuulotin kaatwekwak, koberberisiote konyekwak, kobendi ak kokwaisoti, ak kocheiyoti kelyekwak:

¹⁷ bire anyun Kiptaiyat tibikab Sion bokbogenetab metowekwak, ak kong’anyei Jehovah ichek koba ach ngor.

¹⁸ Istoi Kiptaiyat eng’ betunoto kororonindab mugurekwak, ak kwambelelik, ak karik che bo kaatit;

¹⁹ munaok, ak karikab eunek ak ngoroik che kitugege;

²⁰ ak chepkuloik, ak sirimwek che bo kelyek, ak angok che iuegei, ak sandugusiekab nyamdutik, ak karik che bo itik;

²¹ peteinik, ak munaok che kororon che bo serut;

²² ngoroik che kororon che bo tuiyosiek, ak sumotik, ak angok che kitugegei, ak lolonik;

²³ kioinik, ak katanit ne kararan, ak chepkuloik, ak angok.

²⁴ Ak tun kigeere nyamdutik che anyiny, nunatet: ak kogeere birenet, rogoet; ak kogeere sumeek che iletotin, bosta; ak kogeere anget ne kararan, kuniet ne kigermenegei: ak kogeere kororonindo, soremik.

²⁵ Kibare mureniguk rotwetab chok, ak kebar biguk che kimen eng’ luget.

²⁶ Ak koririo ormarichokyik ak koteiyo; ak koguber ak kotebe ng’ony.