ISAIAH 29 - BUKUIT NE TILIL

Kit ne ya ne nyonjin Ariel

¹ Bwa Ariel, Ariel, nganaset ne kimeny Daudi! Otes kenyit eng’ kenyit; ingorubatgei igorwek:

² si aiim anyun Ariel, ak kobiit rirek ak kateiyet: ak koigei eng’ ane Ariel.

³ Amu amuutin komoswek tugul, ak ayiemenen teeksosiek che koen, ak ateech irimoik si kebarge.

⁴ Ak kinyeratin, ak ing’alal imi ng’ung’unyek, ak kinyerat ng’aleguk komong’une temburiek; ak kogergeit tweguneng’ung’ ak chito ne boisie oik, ne mong’une ng’ung’unyek, ak ichaam ng’aleguk eng’ temburiek.

⁵ Ago kergeitu chang’indab buniguk ak ng’ung’unyek che busbus, ak kogergeit chang’indab che imuisei ak metetek che arureni; ee, biitu eng’ cheiset.

⁶ Nyonjin Jehovah ne bo lugosiek inendet eng’ tulet, ak eng’ botanetab ng’ony, ak bolatet ne o, ak kipchurjuriet ak usonet ne o, ak liblibenetab mat ne beelsei.

⁷ Ak kogergeit karuotitoet, ne ng’ang’utiet ne bo kemoi, ak chang’indab bororiosiek tugul che baregei ak Ariel, agot ichek tugul che baregei ak inendet ak irimennyi, ak che inyalili inendet.

⁸ Ak kogergeit ak ye iruotitoi chito ne amei rubet, ak ogeero, amisiei; ago kosu, ak mi buch sobondanyi: anan kogergeit ak ye iruotitoi chito ne amei melel, ak ogeero, eeisei; ago kosu, ak ogeero, tanui, ak machei sobondanyi koee; u noto anyun chang’indab bororiosiek tugul che baregei ak tulwetab Sion.

⁹ Ogenisie ak okwong’ie; oyai ko u ye omache, ak ogorie: kabogityo, ago ma eng’ divaik; terterioti, ago ma eng’ maiyek.

¹⁰ Amu kirong’jok Jehovah tamirmirietab ruondo ne nyigis, kigoger konyekwok, choto ko maotik, ak kigotuch kandoikwok, choto ko keerik.

¹¹ Ak kagergeit eng’ okwek ng’ang’utiet tugul ak ng’alekab bukuit ne kiging’och, ne igochin bik chito ne inetat, kolenji, Asomin ale, soman bukuini: ak kole, Mamuchi, amu kiging’och.

¹² Yeityo kigochi chito ne ma inetat, kolenji, Asomin ale, soman bukuini: ak kole, Ma a chi ne inetat.

¹³ Ak kile Kiptaiyat, Amu rikyina bichu kong’alalwa, ak kogonyita eng’ kutuswekwak, ago kigoisto mugulelwekwak kolooegitu eng’ ane, ak kaiyweisiet ne iywea ko ng’atutiet ne kiineti bik ichek:

¹⁴ ogeer anyun-o, ayae boisiet ne kitang’ang’jin eng’ kwenutab bichu, boisiet ne kitang’ang’jin ak kekwong’e; ak kobet ng’omnatetab bikwak che ng’omen, ak keuny kaguiyetab bikwak che ng’omen.

¹⁵ Bwa eng’ ichek che cheng’ei mising’ koung’e Jehovah kiruogenywa, ak mi boisionikwak mesundeito, ak mwaei kolen, Ng’o ne keerech? Ak ng’o ne ingenech?

¹⁶ Ogabui tuguk! Tos kiroge cheptereniot menet; kot komwa kit ne kigiyaei agobo inendet ne kiyaei, kole, Kima koyaa, anan komwa kit ne kiginamdos agobo inendet ne kiinamdos, kole, Matinyei inendet kaguiyet?

¹⁷ Tos mami boroindo kitigin, si kewal Lebanon koek mbaret ne rurei kot, ak kiit mbaret ne rurei koek osnet?

¹⁸ Ak tun kasei eng’ betunoto ng’alekab bukuit bik che magastoi, ak kogeerto eng’ mesundeito ne o ak eng’ ole imen konyekab che koriotin.

¹⁹ Tesei kogeny boiboiyenywa eng’ Jehovah, bik che iming’inegei, ak koboiboitune bik che bonon, Inendet ne Tilil ne bo Israel.

²⁰ Amu kiyaei inendet ne imuisei koek buch, ak kosis sasindet, ak keisto bik tugul che igeni yaitiet:

²¹ che igochin bik kochalwogense ng’alekwak, ak koriich mestet agobo inendet ne itigonisiei eng’ ormarichet, ak komaas chito ne bo iman eng’ kit ne bo buch.

²² Mwaei ko u ni anyun Jehovah, ne kiitiach Abraham, agobo gotab Jakobo, kole, Ma kolilani anyun Jakobo, ama koarogeni.

²³ Ago ye keer inendet lagokyik, noto ko boisietab eunekyuk, che mi kwenunnyi, kotaban kainennyu; ee, itabani Inendet ne Tilil ne bo Jakobo, ak koiywei Kamuktaindetab Israel.

²⁴ Nyoru kaguiyet agichek icheget che ichiliili eng’ tamirmiriet, ak konetgei konetisiet ichek che ing’unyng’ung’dos.