ISAIAH 28 - BUKUIT NE TILIL

Kit ne ya nyonjin Samaria

¹ Bwa eng’ chepkuletab menotet ne bo kibogitinikab Epraim, ak eng’ taptet ne resei ne bo kororonindab laitornatennyi, ne mi metitab atebwet ne akwai ne bo ichek che kigoterter divaik!

² Ogeero, tinyei Kiptaiyat chito age ne nyigan ak ko kim; ko u usonetab roptab koik, usonet ne ng’emisiei, ko u usonetab beek che kimen, che ing’irtogei, wirjin ng’ony ko u noto eng’ eunnyi.

³ Kitiekyin ng’ony chepkuletab menotet ne bo kibogitinikab Epraim;

⁴ kergeitu taptet ne resei ne bo kororonindab torornatennyi, ne mitei metitab atebwet ne akwai, ak logoiyatab mogoiywet ne kiga sib korur ko tomo kobiit kemeut; ne ye keer chi koam eng’ yoto kota komi eunnyi.

⁵ Egu Jehovah ne bo lugosiek eng’ betunoto nariet ne bo torornatet, ak kutwetab telunatet, eng’ bikyik che ng’etu;

⁶ ak koek tamirmirietab kiruoget eng’ inendet ne tebe kiruoget, ak koek kimnatetab icheget che weektoi luget eng’ ormarichet.

Konyonjin kamuiset Jerusalem

⁷ Ago kigochilil chuto agichek amu divaik, ak kigomasta amu maiyek; kigochilil tisiindet ak maotiot amu maiyek, kigomaluuch divaik ichek, kigomasta amu maiyek; ichiliili eng’ ng’ang’utiet, ibutos eng’ kiruoget.

⁸ Amu kigonyi mesosiek tugul kang’ung’daik ak simwek, mami ole tilil.

⁹ Ineti ng’o inendet naet? Ak ng’o ne igochin koguiyo ng’alek? Ichek che kigeluge, che kigeete kochuchun?

¹⁰ Amu kineti ng’atutiet kegetyingei ng’atutiet, kineti ng’atutiet kegetyingei ng’atutiet; kineti konetisiet kegetyingei konetisiet, kineti konetisiet kegetyingei konetisiet; kitigin eng’ oli, kitigin eng’ olo.

¹¹ Achicha, ago ng’alaljin bichu eng’ kutuswekab toek ak eng’ kutit age;

¹² che kimwachi inendet kolenji, Kamuung’et nito, ogochi kamuung’et inendet ne ng’atat; ak kasoobet nito: ago ma cham kogas.

¹³ Noto anyun, egu ng’olyotab Jehovah eng’ ichek ng’atutiet ne kineti kegetyingei ng’atutiet, ng’atutiet ne kineti kegetyingei ng’atutiet; konetisiet ne kineti kegetyingei konetisiet, konetisiet ne kineti kegetyingei konetisiet; kitigin eng’ oli, kitigin eng’ oloto; si keba, si kebee batai kobutyo, ak koilyo, kenam eng’ mestet, ak kimut.

¹⁴ Ogas anyun ng’olyotab Jehovah okwek bik sasik, che obou bichu mi Jerusalem.

¹⁵ Amu kiomwa ole, kigiyomisge ak meet, ak kigiyanjine ak oldab meet; ye siirto biret ne o, ko maityinech; amu kigeyai lembechek koek ole kimwechini, ak kigiung’ege lembeita:

¹⁶ mwaei anyun Kiptaiyat Jehovah kole, Ogeero, andoi Sion koita koek lumeiywot, koita ne kigetiem, koita ne bo kamanutiet ne o ne bo luita, lumeiywot ne kim; maigirgiri ne iyani.

¹⁷ Ak ayai kiruoget koek kit ne litit, ak ayai imanda koek borowet ne kilititisie: ak kobukto koikab ropta ole kimwechin eng’ lembechek, ak komarane beek ole kiung’egei.

¹⁸ Ak kewal kayomiseng’wong’ ne kioyomisge ak meet koek buch, ama tononi kayanjineng’wong’ ne kioyanjine ak oldab meet: ye siirto biret ne o, ketiegatak anyun eng’ yoto.

¹⁹ Ibok eng’ betut age tugul ye siirtoi; amu siirtoi karonet age tugul bet ak kemoi: ak egu kamuiset kityo ye ogase ng’alek.

²⁰ Amu nwagitu itogut kosiir ne imuchi koiitoegei chito; ak kotendenit kit ne ketugegei kot kosiir ne yamei kotugegei chito.

²¹ Amu ng’eetei Jehovah ko u eng’ tulwetab Perasim, nerechi ko u eng’ atebwetab Gibeon; si kobiit koyai boisiennyi, boisiennyi ne ter, ak koges boisiennyi, boisiennyi ne ter.

²² Noto anyun, amat oegu sasik, si magigiich ratutikwok amu kiagas kagesunet ne kigeng’at, eng’ ng’ony komugul, ne bunu Kiptaiyat, Jehovah ne bo lugosiek.

²³ Oeb it, ogas kutinnyu; oeb it, ogas ng’alekyuk.

²⁴ Tos ibatisiei chito ne ibatisiei kotugul si kogol? Tos ibati ak kobirei mogoronik kotugul che bo mbarennyi?

²⁵ Ye kagobirok mbaranato komieit, ko tos maletoi keswekab ngwek ak kogol kamon, ak kogolji nganok ortinwek, ak kogolji sairik ole kigilewenji, ak bek alak che kiguure kusemet eng’ tabanwekyik?

²⁶ Amu itigoni Kamuktaindennyi inendet komie, ak konet.

²⁷ Amu magibore kit ne ng’atib keswekab ngwek, ama kimildoe keldab karit kamon; ago kibire kirokto keswechoto, ak kibire ketit kamon.

²⁸ King’oe nganok che kikwanyei; amu magiborei kotugul; agot ngoseer keldab karinnyi ak mbartanyisiekyik, ko mang’aei.

²⁹ Bunu nito agine Jehovah ne bo lugosiek, ne kikwong’e kiruogennyi, ak kogesunotgei eng’ ng’omnatet.