ISAIAH 27 - BUKUIT NE TILIL

¹ Tun birei Jehovah eng’ betunoto eng’ rotwennyi ne bo chok ne korom ak ko o ak ko kim, tiondo ne bo beek ne u ting’ong’et, ne erenet ne chepcheb, ak tionyoto ne erenet ne taategei; ak kobar maswetit ne mi nyanjet.

Mbaretab sabibuk ne bo Jehovah

² Otienji eng’ betunoto, mbaretab sabibuk ne bo divaik.

³ Ane Jehovah ne aribe; abisi kotugul, aribe kemoi ak bet si mang’em chi.

⁴ Matinye neregek che ng’wonen: kata mie nda koboriena katablelinik ak katok! Ta katiegoti ichek, ta kabeele tugul.

⁵ Anan konam inendet kimnatennyu, si koyai kalyet kobota; ee, ingoyai inendet kalyet kobota.

⁶ Kimitu Jakobo eng’ betusiek che bwanei; bitei Israel ak kong’at: ak konyiit ng’ony logoek.

⁷ Tos kigobir inendet ko u ye kibir ichek che kibir inendet? Anan kagibar inendet ko u barisietab ichek che kibar inendet?

⁸ Kioborie ak inendet ne yamei, ye kiione; kiisto inendet eng’ usonennyi ne ng’wan eng’ betutab usonetab kong’asis.

⁹ Tun kiundoi anyun eng’ nito yaitietab Jakobo, ak chuto ko logoek tugul che kiistoe tengektanyi; ye kagoyai koik tugul che bo kaptisisiet kogergeit ak tartarik che kigitui, kot ko ma kong’eetos kogeny Aserik ak itonwekab asista.

¹⁰ Amu mi inegei nganaset ne ng’otat, meng’otet ne kigeue, ak kemeto, ne u ong’atet: agete yoto moita, ak koru yoto, ak koam temenikyik.

¹¹ Ye kagoresyo temenikyik, koilyo; bwanei kwonyik ak kobeel: amu bororiot ne matinyei naet; noto anyun marire ichek inendet ne kiyai, ama tiytii ichek inendet ne kimimii.

¹² Ak tun birei Jehovah eng’ betunoto logoekyik korara, koboch nyiietab Ainet agoi kererutab Misri, ak kiyumak agenge agenge, ee okwek lagokab Israel.

¹³ Ak tun kiguutei iriaget ne o eng’ betunoto; ak tun bwanei che ki negit kolusyo eng’ emetab Asuria, koboto che kigetimda eng’ emetab Misri; ak tun ilosu Jehovah eng’ tulwet ne tilil eng’ Jerusalem.