ISAIAH 26 - BUKUIT NE TILIL

Tiendab kalosunet eng’ Juda

¹ Tun kitieni tieni eng’ emetab Juda eng’ betunoto: Kitinye achek nganaset ne kim; ng’atei inendet yetunet koek inatusiek ak irimoik.

² Oyat ormarichok, si kobiit kobun kwo orit bororiet ne bo iman, ne ribei imanit.

³ Iribe inendet kotebe kalyet ne igesunotgei, inendet ne tiienengei kabwautuikyik: amu imang’un.

⁴ Omang’u Jehovah koigeny: amu mi eng’ Jehovah JEHOVAH ruandet ne bo koigeny.

⁵ Amu kigochoor inendet ichek che menyei ole toror, nganaset ne toror: iluuli inendet; iluuli agoi temburiek.

⁶ Kitiechei; tiechei kibananiat, ak ne matinyei kiy.

⁷ Litit oretab inendet ne bo iman: inye ne i litit, indochini ortinwekab chito ne bo iman.

⁸ Ee, kigigenin, inye Jehovah, eng’ oretab kiruogutiguk; makyingei sobonwekyok kaineng’ung’ ak kabwateng’ung’.

⁹ Koamachin eng’ sobondanyu kemoi; ee, acheng’in eng’ tamirmiriennyu kotom koeech: amu ye mi ng’ony kiruogutiguk, konetegei che menyei ng’ony imanda.

¹⁰ Agot nda kiborji chamet kiptengekyot, ko mainetigei imanda kora; yaei inendet ne ma bo iman eng’ emetab imanda, ama keerei telunatetab Jehovah.

¹¹ Kasutok eung’ung’ Jehovah, ama keerei ichek: ago keerei kagiileng’ung’ bo ge agobo bik, ak kolilanso; ee, laldos buniguk.

¹² Inye Jehovah ne ing’atwech kalyet amu inye ne kiiyaiywech kogeny boisionikyok tugul.

¹³ Ee Jehovah Kamuktaindennyo, kigoboiywech kiptainik alak; ago eng’ inye, inyege, kemwae kaineng’ung’.

¹⁴ Kigobek ichek, ma kosoptos; kigobek, ma kong’eetos: kiinyonji anyun ak ing’em ichek, ak kiigochi kolus kabwatet age tugul agobo ichek.

¹⁵ Kiites bororiet, ee Jehovah, kiites bororiet kobarait; i ne itororot: kiites kobaraitu kiwotosiek tugul che bo emet.

¹⁶ Ee Jehovah, kigobwanjin ichek eng’ nyalilda, kisain ye kiitigon ichek.

¹⁷ Ko u kwondo ne tamano, ne kagorik betusiek che chute go, komi eng’ ng’wanindo, ak korirei amu ng’woninwekyik; ee Jehovah, kigi u noto agachek eng’ taing’ung’.

¹⁸ Kigi tamonoin, kigimi ng’wanindo, u kele, kigisich usonet kityo; tom keyai sorunet age tugul eng’ ng’ony; ama ibutyo bikab ng’ony.

¹⁹ Tun soptos cheguk che kigobek; ng’eetos muswekyuk. Ong’eetye ak otien, okwek che omenye ng’ung’unyek: amu u rewondeng’ung’ rewotab ngwek, ak konu ng’ony che kigobek.

²⁰ Obwa, bikyuk, nyo goriguk orit, ak iger kurgotiguk: unyge ne matia, agoi kosiirto neregek.

²¹ Amu, ogeero, mong’u Jehovah eng’ oldanyi si kobiit kobir che menyei ng’ony amu yaitienywa: ng’anyei ng’ony kogeny korotikyik, ama kotuchei bikyik che kigibar.