ISAIAH 24 - BUKUIT NE TILIL

Kiruokyin ng’ony

¹ Ogeero, yaei Jehovah ng’ony koek ole mami kiy, koek surkwen, ak kogabui, ak koseer bik che menyei oloto.

² Ak kit ne u eng’ bik, ko u noto eng’ tisiindet; kit ne u eng’ otwogindet, ko u noto eng’ kiptaiyandennyi; kit ne u eng’ otwogindet ne chepto, ko u noto eng’ chebioset ne bou inendet; kit ne u eng’ alindet, ko u noto eng’ aldaindet; kit ne u eng’ chito ne besendoi, ko u noto eng’ besenindet; kit ne u eng’ ne ibei keljinet ne siirei, ko u noto eng’ ne igochin inendet.

³ Kiyai emet koek ne matinyei kiy, ak keng’em; amu kagomwa Jehovah ng’olyondonito.

⁴ Arogeni ng’ony ak kowong’gei, nyaluli ng’ony ak kowong’gei, nyalildos bik che mendos che bo ng’ony.

⁵ Kigimuruon ng’ony amu bik che menyei; amu kigobistoe ng’atutik, kigowal kiruogutik, kigobut kayomiset ne bo koigeny.

⁶ Kigoam anyun chubisiet ng’ony, ak kigonam ng’ogisto che menyei: kigibeel bik che menyei ng’ony, ak king’et che ng’ering’.

⁷ Rirtos divaik che leelach, restos ketikab sabibuk, tigendos tugul che igasegei.

⁸ Sisei kagasetab ge ne bo sugutit ne ming’in, igesugei bolatetab icheget che boiboi, sisei boiboiyetab ketubet.

⁹ Maeei divaik kotiendos; ng’wonegitu maiyek eng’ icheget che eei.

¹⁰ Kigebut nganaset ne mi chemarget: kigerei got age tugul, si manyo chi go.

¹¹ Mi rirek ortinwek amu divaik; kagoimenit boiboiyet tugul, kigobet boiboiyetab emet.

¹² Ng’etu kubernatet eng’ nganaset, ak kebare ormarichet ng’emisiet.

¹³ Amu egu ko u noto eng’ ng’ony eng’ bororiosiek, ko u ye kitumdumi emitik, ko u turisietab sabibuk ye kagogesgei kesisiet.

¹⁴ Waaktos chuto, boldos; boldos mising’ eng’ nyanjet amu etunatetab Jehovah.

¹⁵ Otoror anyun Jehovah eng’ kong’asis, otoror kainetab Jehovah, Kamuktaindetab Israel, eng’ ngegusiekab nyanjet.

¹⁶ Kigegas tienwogik che bunu tabanwekab ng’ony, kolen bo torornatet ne bo imanda. Ago kiale, Asagiti, asagiti, bwa eng’ ane! Kigoberberis kaberberik; ee, kigoberberis mising’ kaberberik.

¹⁷ Kanyonjin kaiyweisiet, ak keringet, ak mestet, ee inye ne imenye ng’ony.

¹⁸ Ak tun ibutyin keringet inendet ne mwee bolatetab kaiyweisiet; ak namei mestet inendet ne togosune keringet: amu yatotin tirisiok eng’ barak, ak botandos lumeiywekab ng’ony.

¹⁹ Kigobutok ng’ony mising’, kigobetak ng’ony mising’, kigotumdumgei ng’ony mising’.

²⁰ Terterioti ng’ony ko u chito ne kabogit, ak keistoot kwo komosi ak komosi ko u got; ak konyigisityi bistoennyi, ak kobut, ama kong’eetei kogeny.

²¹ Ak tun birei Jehovah eng’ betunoto eng’ barak lugetab icheget che tororen, ak kobir laitorinikab ng’ony eng’ ng’ony.

²² Ak kiyum ichek tugul, ko u ye kiyumi kimonjororinik eng’ keringet, ak kegerji korgoret, ak ye kagobata betusiek che chang’, kebir.

²³ Ak kotoptoben arawet, ak kolilan asista; amu laitorani Jehovah ne bo lugosiek eng’ tulwetab Sion, ak eng’ Jerusalem, ak eng’ taitab boisiekyik.