ISAIAH 23 - BUKUIT NE TILIL

Kit ne ya ne nyonjin Turo

¹ Lautietab Turo. Oteiye okwek melisiekab Tarsis; amu kageng’em, kot ko ma komi got, anan ole kibunei kebendi orit; amu kiging’ang’ji ichek ng’olyondonito eng’ emetab Kitim.

² Osisye, okwek che omenye ole bo ngegut; inye ne kiinyiitun tuguk chemung’arainikab Sidon, che kilong’une nyanjet.

³ Ak keljinennyi ko ki iyotetab Sihor ne kibunu beek che chang’, noto ko kesisietab Nael; ak ki oldab aldaisiet ne bo bororiosiek.

⁴ Ililan, ee Sidon: amu kagong’alal nyanjet, irimetab nyanjet kole, Tom anyoru ng’wanindo, anan asigisie, anan abai murenik, anan bergeinik.

⁵ Ye it ng’alek Misri, konyoru ichek ng’wanindo ne o mising’ eng’ ng’alekab Turo.

⁶ Olande Tarsis; oteiye, okwek che omenye ngegut.

⁷ Tos nganaseng’wong’ ni ne bo boiboiyet, ne kimi koboch keny, ne kiimut kelyekyik kwo ole loo?

⁸ Ng’o ne kichob ng’olyondonito agobo Turo, ne ilaakyin bik kutonok, che chemung’arainikyik ko bounik che aldaikyik ko bik che konyitotin che bo ng’ony?

⁹ Kigochob noto Jehovah ne bo lugosiek, si kobiit komuruon menotet tugul ne bo torornatet, ak kotewer bik tugul che konyitotin che bo ng’ony.

¹⁰ Bun emeng’ung’ ko u Nael, ee cheptab Tarsis; ma itinye birenet kogeny.

¹¹ Kigotokyi eunnyi nyanjet, kigotumdum bounatosiekab laitorinik: kigon Jehovah ng’atutiet agobo Kanan, kole, keng’em irimoikyik.

¹² Kile, Ma iboiboitu inye, ee ne i bergeiyat, cheptab Sidon ne kiusei: ng’eet, lande, ui Kitim; ago menyoru kamuung’et agot eng’ oloto.

¹³ Ogeero, emetab Kaldeik; ma komi bichoto; kigochopchi Asuriaindet emonoto tiong’ikab ong’atet: kiteech teeksosiekwak che koen, kibut gorikyik che bo laitorinik: kigong’em.

¹⁴ Oteiye, okwek melisiekab Tarsis: amu kigeng’em irimeng’wong’ kiges.

¹⁵ Tun kiutie Turo kenyisiek tamanwogik tisab eng’ betusiechoto, ko u betusiekab laitoriat agenge: ak eng’ kagesunetab kenyisiek tamanwogik tisab, koigei Turo kit ne u tiendab chepkugoniot.

¹⁶ Nam ketubet, ak iwendote nganaset, inye chepkugoniot ne kigeutienen; tien korur, tien tienwogik che chang’, si kibwatin.

¹⁷ Ak ye ibata kenyisiek tamanwogik tisabu, koityi Jehovah biret Turo, si koweek konyor mung’arennyi, si koyai kugoinatennyi koboto bororiosiek tugul che bo ng’ony eng’ emet.

¹⁸ Ak koek mung’arennyi ak melektanyi tililindo eng’ taitab Jehovah: magigonori ama kibasei; amu bunjin mung’arennyi ichek che menyei taitab Jehovah, si koam kobiyong’so, ak kolaach ngoroik che bo telunatet.