ISAIAH 22 - BUKUIT NE TILIL

Kigere kong’ berberindab Jerusalem

¹ Lautietab atebwetab ng’ang’utiet. Amin nee anyun, kot itogoste gorik barak?

² Ee inye ne nyiitat bolatosiekab bik, nganaset ne nyiitat wasetab ge, nganaset ne baibai; ma kibare biguk rotwetab chok, ama begu eng’ luget.

³ Kimwei kibagenge bouniguk, kirat mwogik ichek: kigirat tugul che kiginyor eng’ okwek, kimwei ichek kolooegitu.

⁴ Kiamwa anyun ale, Welelge amegeera, si arir eng’ ng’wanindo; mat ibirtege ile igaigaa, amu luuletab cheptab bikyuk.

⁵ Amu betutab nyalilda ni, ak ne bo tieget, ak ne bo kaiimetab ge, ne bunu Kiptaiyat, Jehovah ne bo lugosiek, eng’ atebwetab ng’ang’utiet: butetab irimoik, ak rirek che kirirjin tulonok.

⁶ Ak kiib Elam motiet, koboto karisiek che bo luget ak bik che lanyei mbartanyisiek; ak king’any Kir long’et.

⁷ Ak kinyi atebwosieguk che miach karisiek che bo luget, ak kitetgei bik che kilanyei mbartanyisiek eng’ ormarichet.

⁸ Ak kiisto inendet kit ne kituchei Juda; ak kiigeer inye eng’ betunoto karikab luget eng’ got ne mi osnet.

⁹ Ak kiogeer ole chang’ ole kigobutogis eng’ nganasetab Daudi: ak oyum beekab tamboiyot ne mi ng’ony.

¹⁰ Ak oiit gorikab Jerusalem, ak obut gorik si kobiit ogimit irimet.

¹¹ Kiobal keringetab beek eng’ kwenutab irimoik aeng’, si korootyi beekab tamboiyot ne bo keny: ago ma ogeer inendet ne kiyaei nito, amoiit ole kiy inendet ne kiyaei nito keny.

¹² Ak kiguurso eng’ betunoto Kiptaiyat, Jehovah ne bo lugosiek, si kobiit oririe, ak oteiye, ak ocheru metowek, ak olaach kuniok:

¹³ ak ogeero, boiboiyet ak kagasetab ge, eng’setab kechirek ak ne bo tuga, oame banyek ak oee divaik: ongeamisie ak keeise, amu kibegu mutai.

¹⁴ Ak king’ang’jigei Jehovah ne bo lugosiek itikyuk, Magitililok iman eng’ yaitioni kot obegu, mwaei Kiptaiyat, Jehovah ne bo lugosiek.

Kerebe Sebna boisiennyi ak kieeti Eliakim

¹⁵ Kamwa ko u ni Kiptaiyat, Jehovah ne bo lugosiek, kole, Ui ole mi ne ribei tuguk, oldab Sebna, ne bou got, ak ilenji,

¹⁶ Iyae nee eng’ yu? Ak omi ak ng’o yu, kot ibaljige kererit eng’ olito? Ko u ne baljingei kererit eng’ ole bo barak, ne baljingei ole menyei eng’ ruandet!

¹⁷ Keero, wirtoin Jehovah eng’ kimnatet ko u chito ne kim; ee, taain mising’.

¹⁸ Weleljiningei iman ak kowirten iwe barak ko u tagurguruet eng’ emet ne baraa; imechini oloto, ak mitei oloto karisiekab luget che bo torornateng’ung’, inyendet tewernatetab gotab kiptaiyandeng’ung’.

¹⁹ Ak aonin eng’ boisieng’ung’, ak kong’usun inyo ng’ony.

²⁰ Ak aguur otwogindennyu Eliakim weritab Hilkia eng’ betunoto:

²¹ ak alaakyi inendet ngorieng’ung’, ak agimite inendet bireng’ung’, ak agochi inendet bounateng’ung’: ak koek inendet kwandab bik che menyei Jerusalem, ak ne bo gotab Juda.

²² Ak ande tigikyiennyi yatutietab gotab Daudi; ak yatei inendet, ama mi chi ne kerei; ak kerei inendet, ama mi chi ne yatei.

²³ Ak agiich inendet ko u kipchumariat eng’ ole kim; ak koek ng’echeretab torornatet eng’ gotab kwandanyi.

²⁴ Ak kolaakyi ichek inendet torornatet tugul ne bo gotab kwandanyi, iyotet ak lagok, teret age tugul ne ming’in, koboch tugukab kikombok agoi chuboinik tugul.

²⁵ Mwaei Jehovah ne bo lugosiek kole, Kiistoi eng’ betunoto kipchumariat ne kiga kigiich, eng’ ole kim: ak keeb, ak kolul, ak keisto lautiet ne kitinyei; amu kagomwa Jehovah nito.