ISAIAH 21 - BUKUIT NE TILIL

Kenemei Babulon

¹ Lautietab ong’atetab nyanjet. Ko u ye ibuksei kipchurjuriet ne bunu Murot ne bo Tai, kobunu ko u noto ong’atet, emetab kamuiset.

² Kagiborua ng’ang’utiet ne ng’wan; iberberisiei kaberberindet, ak kong’emisiei ng’emindet. Ee Elam, togoste; ee Media, yiemisie; kaawong’u tigenoikyik tugul.

³ Kanyi anyun arogenet suennyu; kanama ng’woninwek, ko u ng’woninwekab kwondo ne machei kosigis: ama kot ko mamuchi agasta; aarogeni kot ko mamuchi ageerto.

⁴ Rukrugeni muguleldanyu, kagomua toptobenet: kawalak boiboiyennyu koek botanet.

⁵ Iitoi meset, indoi ribik, amisiei, eeisei; ong’eetye, okwek bounik, oiil long’onik.

⁶ Amu kamwawa Kiptaiyat agobo noto kole, Ui, inde ribindet; ingomwa inendet kit ne keerei:

⁷ ak ye keer karikab luget, bik che lanyei mbartanyisiek kobwanune aeng’, che lanyei sigirok, che lanyei tambesik, koeb it komie eng’ kagiiletab ge.

⁸ Ak kowaach inendet ko u ng’etundo kole, Ee Kiptaiyat, atononi kotugul eng’ teekset ne koi ne kiripse bet, ak kindea ole aripse kemousiek tugul:

⁹ ak, ogeero, bwanei bikab luget, bik che lanyei mbartanyisiek che bwanune aeng’. Ak kiwol inendet kole, Kagobut Babulon, kagobut; ak kagoilyo itonwek tugul che kigiwai che bo kanamonikyik koba ng’ony.

¹⁰ Ee inye, kesisiennyu, ak bek che bo ole kituisie: kaamwawok che kiagas eng’ Jehovah ne bo lugosiek, Kamuktaindetab Israel.

Kit ne ya ne nyonjin Edom

¹¹ Lautietab Duma. Kuura age eng’ Seir, kole, Ribindoni, egu nee kemoi? Ribindoni, egu nee kemoi?

¹² Mwaei ribindet kole, Kagoeech, ak konyonei kogeny kemout: ngot omache oteeb, oteeb: oweege, obwa.

Kit ne ya ne nyonjin Dedanik

¹³ Lautietab Arabia. Omenye osnet eng’ Arabia, ee okwek che rutoi che bo Dedanik.

¹⁴ Kiipchi beek inendet ne kiamei melel; kitoroktae amitwogik bik che kimenyei emetab Tema, bik che kimweei.

¹⁵ Amu kimwee rotokab chok, rotwetab chok ne kaging’us, ak kwanget ne kaging’i, ak eng’ ng’wanindab luget.

¹⁶ Amu kagomwawa Kiptaiyat ko u ni kole, Kotom kogesgei kenyit agenge, ko u kenyisiekab otwogindet ne kisirei, kwong’ugei torornatet tugul ne bo Kedar:

¹⁷ ak ng’ering’itu che ng’etu eng’ mwogik, murenik che kimen che bo bikab Kedar: amu kagomwa nito Jehovah, Kamuktaindetab Israel.