ISAIAH 20 - BUKUIT NE TILIL

Kaborunet ne iboru ng’emisietab Misri

¹ Eng’ kenyit ne kiwa Tartan Asdod, ye kiiyokto Sorgon laitoriatab Asuria, ak kobargei ak Asdod, ak koluul;

² king’alal Jehovah eng’ betusiechoto eng’ Isaia weritab Amos, kole, Ui ireegu kuniok che igermenege, ak ireegu kweoniguk. Ak kiyai ko u noto, kowendot ach ngor ama tinyei kweonik.

³ Ak kimwa Jehovah kole, Ko u ye kogowendot otwogindennyu Isaia ach ngor ama tinyei kweonik, kenyisiek somok koek kaborunet ak kwong’utiet eng’ Misri ak eng’ Etiopia;

⁴ imuti ko u noto laitoriatab Asuria luulenik che bo Misri, ak luulenikab Etiopia, che mengech ak che osen, komi ach ngor ama tinyei kweonik, kotoogu ngorook, ne kalilanetab Misri.

⁵ Ak koarogenso, ak kolilanso, amu kamang’unenywa Etiopia, ak ko torornatenywa Misri.

⁶ Ak tun mwaei eng’ betunoto ne menyei emoni bo ngegut, kole, Ogeero, nito ko kamang’unennyo, ne kigimwachi agobo toretet si kesoruech eng’ laitoriatab Asuria: ak achek anyun, kechilildoi ano?