ISAIAH 2 - BUKUIT NE TILIL

Sion na kituiyechin ye kilosu Jehovah. Laitorani kalyet eng’ oldo tugul

¹ Ng’olyotab Isaia weritab Amos, ne kigeer agobo Juda ak Jerusalem.

² Kimitu eng’ betusiek che bo let, tulwetab gotab Jehovah eng’ tulonok barak, ak kitorori kosiir tulonok che mengechen; ak tun itendenjin oloto bororiosiek tugul.

³ Ak tun itendenjin oloto bik che chang’ kolen, Obwa, kebe ketogoste tulwetab Jehovah, agoi gotab Kamuktaindetab Jakobo; si konetech ortinwekyik, si kebendate ortinwekyik: amu mong’une ng’atutik Sion, ak komong’une ng’olyotab Jehovah Jerusalem.

⁴ Ak koruoksechin inendet bororiosiek, ak koger kong’ bik che chang’: ak kotany rotokwak bo chok koek mogomboik che bo tuga, ak kotany ng’otwekwak koek chepkesok: si ma kobargei bororiosiek, ama konetegei luget kogeny.

Tengektab Israel, ak torornatetab Jehovah

⁵ Ee gotab Jakobo, obwa kebendate lapkeiyetab Jehovah.

⁶ Amu kiibagakte biguk, gotab Jakobo, amu kigonyi ichek bitonwekab kong’asis, ak kigoek ichek kipsogeinik ko u Pilistik, ak konamgei eunek koyosiechigei ak lagokab toek.

⁷ Nyiitat emenywa kogeny feda ak tahabu, ama mi ole igesunegei konoraikwak; nyiitat emenywa kogeny mbartanyisiek, ama mi ole igesunegei karisiekwak.

⁸ Nyiitat emenywa kogeny kanamonik; ilosu boisionikab eunekwak, che kiyaei eunekwak.

⁹ Ing’uruksei chito ne nyerat, ak kiming’ini chito ne o: ko u noto anyun amenyochi kaat ichek.

¹⁰ Chut ruandet, ak iung’ege temburiek, imwee kamuisetab Jehovah, ak eng’ torornatetab etunatennyi.

¹¹ Kinyeroti che ieetegei, ak kiming’ini menotetab bik, Jehovah inegei ne tororitu eng’ betunoto.

¹² Amu tun biitu betutab Jehovah ne bo lugosiek, eng’ ichek tugul che mendos ak che ieetigei; ak eng’ ichek tugul che itororigei: ak kiming’ini.

¹³ Ak eng’ taragonik tugul che bo Lebanon, che tororen ak koeetigei, ak eng’ ketik tugul che bo Basan;

¹⁴ ak eng’ tulonok tugul che koen, ak eng’ tulonok tugul che kitororitu;

¹⁵ ak eng’ teekset age tugul ne koi, ak eng’ irimet age tugul ne ng’otat;

¹⁶ ak eng’ melisiek tugul che bo Tarsis, ak eng’ itonwek tugul che kichamei.

¹⁷ Ak kiming’ini kaeetetab ge ne bo chito, ak kinyeroti menotetab bik: Jehovah inegei ne tororitu betunoto.

¹⁸ Ak igesugei kanamonik.

¹⁹ Ak komwechi bik kebenonik che mi ruandosiek, ak keringonik che mi ng’ony, komwee kamuisetab Jehovah, ak eng’ torornatetab etunatennyi, ye kang’eet kotumdum ng’onyuni eng’ kimnatet.

²⁰ Laktoi chito kanamonikyik che bo feda betunoto, ak kanamonikyik che bo tahabu, che kigiyachi inendet si kosa, kolaktochi bung’ung’onik ak reresik;

²¹ si komwechi kebenonik, ak ruandosiek che kibetogis, komwee kamuisetab Jehovah, ak eng’ torornatetab etunatennyi, ye kang’eet kotumdum ng’onyuni eng’ kimnatet.

²² Amomang’u chi, ne mi kabusennyi serunekyik: amu tilei nee?