ISAIAH 18 - BUKUIT NE TILIL

Ng’alek che kiipchin Etiopia

¹ Bwa emet ne tinyei kebebaik che cheitos, ne mi bitonin eng’ ainosiekab Etiopia:

² ne iyoktoi bik che tononjin kobun nyanjet, eng’ tuguk che kigiyae cherungusiek kobun beek barak, kolenji, Oba okwek bik che kiyoktoi che chepcheben, agoi bororiet ne koen bik ak ko ng’orng’oren, bik che imuisei koboch taunenywa agoi: bororiet ne ikwaisei ak kotiegoti, ne pcheei ainosiek emenywa!

³ Okwek tugul che omenye ng’ony, ak okwek che omenye emet, ogeer ye kinamjin barak songoliet eng’ tulonok; ak oeb it ye kiguutei iriaget.

⁴ Amu kamwawa Jehovah ko u ni kolenja, Asise, ak ageere eng’ ole amenye; ko u asista ne ng’wan ne iluu mising’, ko u boldetab rewot eng’ kiptoretab betusiekab kesisiet.

⁵ Amu ye tom kobiit kesisiet, ko kagobutyo taptok, ak koek taptok logoek che rurtos, kotile chepkeswet ole ing’atos, ak koeb koisto temenik che iwaktoi.

⁶ Kibagakyin ichek tugul taritik che koromen che bo tulonok, ak tiong’ikab timin: ak koam taritik che koromen eng’ kemei, ak koam tiong’ik tugul che bo timin eng’ betusiekab kaititiet.

⁷ Kiipchin eng’ betunoto Jehovah ne bo lugosiek kagochinet ne bo bik che koen ak ko ng’orng’oren, ak eng’ bik che imuisei koboch taunenywa agoi; bororiet ne ikwaisei ak kotiegoti, ne pcheei ainosiek emenywa, agoi komostab kainetab Jehovah ne bo lugosiek, noto tulwetab Sion.