ISAIAH 17 - BUKUIT NE TILIL

Kit ne ya ne nyonjin Damasko ak Israel

¹ Lautietab Damasko. Ogeero, kageisto Damasko, si mata koek nganaset, ak egu karatia.

² Kigebagakta nganasokab Aroer: bunjin akwotisiekab kechirek che ruitos, ama mi chi ne imui.

³ Iwong’ugei kogeny irimetab Epraim, ak kowong’gei bounatetab Damasko, ak che king’et che bo Suria; kergeitu ak torornatetab lagokab Israel, mwaei Jehovah ne bo lugosiek.

⁴ Nyerotitu torornatetab Jakobo eng’ betunoto, ak kosagit bortanyi.

⁵ Ak kergeitu ak ye iyumi bek kesindet, ak kesei eunnyi bek; ee kergeitu ak ye kesei chito bek eng’ atebwetab Repaim.

⁶ Nganda u noto, kong’etu turonik, ko u ye kitumdumi emdit, ak kong’etune logoek aeng’ anan ko somok eng’ temet ne tabanu barak, ak kong’etune ang’wan anan ko mut eng’ temenik che kiiwakta kolooegitu che bo ketit ne rurei, mwaei Jehovah, Kamuktaindetab Israel.

⁷ Inyali betunoto chi Yaindennyi, ak kogeerei Inendet ne Tilil ne bo Israel.

⁸ Ama koiiti kapkorosusiek kole kiy, boisionikab eunekyik, anan koiit kole kiy kit ne kiyai eng’ morikyik, anan Aserik, anan kanamonikab asista.

⁹ Igeitu eng’ betunoto nganasokyik che kimen komoswek che kigebagakta eng’ osnet, ak eng’ tulwet barak, che kiga kebagakta eng’ taitab lagokab Israel; ak koek karatia.

¹⁰ Amu kiutie Kamuktaindetab yetuneng’ung’, ama ibwat ruandetab kimnateng’ung’; igole anyun ketik che kororon, ak ketik alak che ter:

¹¹ ing’ote eng’ betutab kolseng’ung’, ak igochini koyesio kesweguk karon: ago mwee kesisiet eng’ betutab arogenet ak ne bo nyalilda ne ng’wan.

Katerteret ne kiterteri Asuria

¹² Bwa, bolatetab bik che chang’, che morortos ko u nyanjosiek; ak bororiosiek che ruaei ko u ruaetab beek che kimen!

¹³ Ruaei bororiosiek ko u ruaetab beek che chang’: ago kerei kong’ inendet ichek: ak komwei kolooegitu, ak keon ko u metetek che ibei usonet eng’ tulonok, ak ko u ye arureni temburiek eng’ kipchurjuriet.

¹⁴ Ogeero, mi kamuiset koskoleny; ak kobetyo kotom koeech. Nito kebebertab ichek che luulech, ak ko kebebertab ichek che rebenech.