ISAIAH 16 - BUKUIT NE TILIL

¹ Okweri arekab kechir eng’ Sela ne tokyingei ong’atet, che bo bounindetab emet, koba tulwetab cheptab Sion.

² Amu kergeitu tibikab Moab eng’ ole kilandoe eng’ Arnon, ak taritik che ombenioti, ak keswet ne kigobutok.

³ Oruoch, otil kiruoget; yai urueng’ung’ koigei kemoi kwen eng’ bet: uny che kigetimda; ameng’wekte che ombenioti.

⁴ Ingomeny koboten chechuk che kigetimda; egu inye ole ung’egei Moab komwee luulindet: amu kagoek buch rebindet, kagogesgei luulset, kagiwong’ usik eng’ emet.

⁵ Ak kigimiti ng’echeretab laitornatet eng’ rirenet, ak tebe chito ng’echeranato eng’ iman eng’ emaitab Daudi; koruoch ak kocheng’ei kiruoget, ak ko chepcheb koyai imanda.

⁶ Kigegas menotetab Moab, kele, menot inendet mising’; eng’ kachaunennyi bo ge, ak menotennyi, ak neregekyik; buch lasennyi bo ge.

⁷ Iteechin anyun Moab Moab, iteei age tugul: orirjini makatinikab sabibuk che bo Kir-hareset, ko kagebirok mising’.

⁸ Amu restos mbarenikab Hesbon, ak ketikab sabibuk che bo Sibma; kigoiri kiptainikab bororiosiek ketikyik che kororon; kiit Jaser, kiombeniot agoi ong’atet; kiwakta temenikyik, kisiir nyanjet.

⁹ Arire anyun eng’ rirekab Jaser agobo ketikab sabibuk che bo Sibma; aisenen beekyuk bo kong’, ee Hesbon, ak Eleale: amu kagobiit waagatab luget eng’ betutab logoeguk che bo kemei ak kesisieng’ung’.

¹⁰ Ak kageisto kagasetab ge, ak keisto boiboiyet eng’ mbaret ne rurei; ak mabiitu tienwogik eng’ mbarenik che bo sabibuk, ama kigasei twegunetab boiboiyet: mami chi ne tiechei divaik eng’ ole kituisie; kaawong’u bolatetab kesisiet.

¹¹ Morori anyun moennyu ko u ketubetab Moab, ak morortos agutanikyuk agichek amu Kir-heres.

¹² Ak ye kagoborgei Moab, ye kabirtogei eng’ oli toror, ak konyor oldanyi ne tilil si kobiit kosa, ago maiterterisiei.

¹³ Nito ng’olyot ne kimwa Jehovah agobo Moab eng’ betusiek che kigosiirto.

¹⁴ Ago kagomwa nguno Jehovah kole, Kotom kogesgei kenyisiek somogu, ko u kenyisiekab otwogindet ne kisirei, kasasei torornatetab Moab, koboto tuiyennyi tugul ne o; ak kong’ering’itu mising’ bik, ak ma kotilei kiy che ng’etu.