ISAIAH 15 - BUKUIT NE TILIL

Kit ne ya ne nyonjin Moab

¹ Lautietab Moab. Amu king’emei Ar ne bo Moab eng’ kemout agenge, kiwong’; amu king’emei Kir ne bo Moab eng’ kemout agenge, kiwong’.

² Katogosta Bayit, ak Dibon, kot koit komoswek che tororen, koba korir: rirjin Moab Nebo, ak eng’ Mediba: mi boswek metowekwak, kigetil tamnet age tugul.

³ Kermenegei kuniok eng’ ortinwekwak: iteei age tugul ak korirei mising’, eng’ gorikwak barak, ak eng’ komoswekwak che baraen.

⁴ Ak rirei Hesbon, ak Eleale; kigasei kutuswekwak eng’ Jahas: waaktos anyun murenikab Moab che ilaachi karik; botani sobondanyi.

⁵ Rirei muguleldanyu amu Moab; mwechin Soar bik che mweoti agoi Eglatselisiya: amu togostoe Luhit koririoti; amu iteitos kateiyet ne bo ng’emisiet eng’ oret ne wendi Horonaim.

⁶ Amu tendos beekab Nimrim: amu kagoresyo suswek, ma kobitos suswek che ng’orng’or, ma komi kiy age tugul ne tuon.

⁷ Ibei anyun chang’indab tuguk che kigonyor, koboto che kigogonor, koba ole mi kererut ne mi ketik.

⁸ Amu kigoit rirek kiwotosiek tugul che bo Moab; kiit kateiyennyi Eglaim, ak kiit kateiyennyi Beer-elim.

⁹ Amu nyiitat korotik beekab Dimon: amu ta aipchini alak Dimon, amutyini ng’etundo inendet ne chilile Moab, ak che ng’etu eng’ emet.