ISAIAH 14 - BUKUIT NE TILIL

Kimutu Israelik koweek emenywa

¹ Amu rire Jehovah Jakobo, ak ta koleweni Israel, ak konde ichek emenywa: ak konamgei toondet agichek, ak konamgei ak gotab Jakobo.

² Ak komut bororiosiek ichek agoi oldanywa: ak kobunji gotab Israel bichoto eng’ emetab Jehovah, koek otwogik ak tibik che otwogik: ak koluul Israel ichek che kiga luul ichek; ak koboi usikwak.

Tiendab katerteret amu meetab laitoriatab Babulon

³ Ak eng’ betut ne konin Jehovah kamuung’et eng’ arogeneng’ung’, ak eng’ nyalindang’ung’, ak eng’ otisiet ne uui ne kigibirjin,

⁴ imwa kalewenoni agobo laitoriatab Babulon, ile, Ha-a, kigowong’gei usindet! Kigowong’gei koromnatet!

⁵ Kigoiri Jehovah kirokta kiptengeginik, siaritab bounik;

⁶ che kibir bororiosiek eng’ neregek eng’ biretab kotugul, che kiboi bororiosiek eng’ neregek, eng’ usisiet ne ma kirinda chi.

⁷ Mi kamuung’et ng’ony komugul, ak komi kalyet: tiendos.

⁸ Ee, boiboitu biribirinik eng’ inye, ak taragonikab Lebanon, kolen, Koboch ngab iru, ko ma ebech chi.

⁹ Kagotumdumgei oldab che kigobek eng’ orit kotorogun ye inyone: ing’eetun bik che kigobek, agot bik che eechen che bo ng’ony; kagong’eet laitorinik tugul che bo bororiosiek koistoegei ng’echerokwak che bo laitornatet.

¹⁰ Wolun tugul kolenjinin, Tos keegu ne nyalulat ko u achek? Keige achek?

¹¹ Kagichorta etunateng’ung’ kwo oldab che kigobek, koboto cheetab kibugandiniguk: isiebe kutik, ak kotuchin kutik.

¹² Ha-a, kaibut eng’ kipsengwet, ee, inye, kecheiyatab bet, weritab karon! Ha-a, kagiebin ibut, inye ne kiinyerat bororiosiek!

¹³ Ak kiimwa eng’ muguleldang’ung’ ile, Atogostoi kipsengwet, atorori ng’echerennyu ne bo laitornatet kosiir kecheikab Kamuktaindet; ak atebe tulwetab tuiyet, eng’ komoswek che looen che bo murot ne bo katam.

¹⁴ Atogostoi asiir bolik; aigeitu Inendet ne Toror Mising’.

¹⁵ Ago anyun, kichoortoin iwe oldab che kigobek, agoi komoswek che looen che bo keringet.

¹⁶ Injururin che keerin, kobwatin kole, Tos chichito ne kiigochi ng’ony kobotan, chichito ne kiitumdum bounatosiek;

¹⁷ ne kiyai ng’ony koek ong’atet, ak koluul nganasokyik; ne ma itiach kimonjororinikyik koba gorikwak?

¹⁸ Ruitos laitorinik tugul che bo bororiosiek, ruitos ichek tugul eng’ torornatet, ruei age tugul eng’ gonnyi.

¹⁹ Ago kagiwirjin sang’ eng’ kerering’ung’ ko u temet ne kiwechei, ko u ngoroikab che kigibar, che kigitoore rotwetab chok, che rektoi agoi koikab keringet; ko u musto ne kitiechei.

²⁰ Motuitosi koboto ichek eng’ tubet, amu kiing’em emeng’ung’, kiibar biguk; ma kemwaei koigeny iyotetab bik che yaei yaitio.

²¹ Ochopchi lagokyik barisiet amu ng’ogistab kwanisiekwak; si mang’eetyo, ak konam ng’ony kobunji, ak konyiit nganasok ng’onyuni.

²² Ak ang’eet agirinde ichek, mwaei Jehovah ne bo lugosiek, ak aiste eng’ Babulon kainet ak che king’et, ak werit, ak weritab werit, mwaei Jehovah.

²³ Ak agochi komeny emonoto chepswererinik, ak tamboinikab beek: ak abuge kabugoitab ng’emisiet, mwaei Jehovah ne bo lugosiek.

Ng’emisiet ne king’emei Asuria

²⁴ Kigoyosyo Jehovah ne bo lugosiek, kole, Ko u ye kiabwat iman, ko yaaksei ko u noto; ak ko u ye kiachob, kotebyei ko u noto:

²⁵ ale atonatoni Asuriek eng’ emennyu, ak atiech eng’ tulonokyuk: koistoegei eng’ ichek choginnyi, ak koistoegei lautiennyi tigikyienywa.

²⁶ Nito chobet ne kigechob agobo ng’ony komugul: ak ni ko eut ne kigichuulji bororiosiek tugul.

²⁷ Amu kigochob Jehovah ne bo lugosiek, ko tos ng’o ne walei koek buch? Ak chuulat eunnyi, ko tos ng’o ne arunyi?

Kit ne ya nyonjin Pilistia

²⁸ Kibiit lautioni eng’ kenyit ne kimee laitoriat Ahas.

²⁹ Amebaibaitu, ee Pilistia, inye tugul, amu kagoil kirokto ne kibirin: amu mong’une tigitiotab ndaret erenet, ak egu iyotennyi erenet ne tirireni, ne u mat.

³⁰ Ak koamis taiywek che bo kibananok, ak koruiyo eng’ chametab ge che matinyei kiy: ak abare rubet tigitiondeng’ung’, ak kebar cheguk che ng’etu.

³¹ Itee, ee ormarichet; rir, ee nganaset; kaichoot, ee Pilistia, inye tugul; amu mong’une iyeto murot ne bo katam, ama tononi chi inegei eng’ betusiekyik che kiging’at.

³² Kiwoljin nee anyun bik che kiyoktoi, che bo bororiet? Kele, Kagolumda Jehovah Sion, ak komwechi oloto bikyik che kigius.