ISAIAH 13 - BUKUIT NE TILIL

Koterteri Medik Babulon

¹ Lautietab Babulon, ne kigeer Isaia weritab Amos.

² Olumde songoliet eng’ tulwet ne churat, owaakyi, ong’werer, si kobiit komandae ormarichokab bik che toogunotin.

³ Koang’at bikyuk che itabanotin, ee, koaguur bikyuk che kimen agobo neregekyuk, chechuget che igasegei etunatennyu.

⁴ Bolatetab tuiyet eng’ tulonok, ne u ne bo bororiet ne o! Bolatetab wasetab ge ne bo bounatosiekab bororiosiek che kaiyumgei! Iyumi Jehovah ne bo lugosiek luget agobo boriet.

⁵ Bunu ichek emet ne loo, ole boch tabandab kipsengwet, inendet Jehovah koboto karikab neregekyik, si kobiit kong’em emet komugul.

⁶ Oteiye; amu kagorik betutab Jehovah; nyonei ko u ng’emisiet ne bunu Inendet ne ko Kamuktaet.

⁷ Nyaluldos anyun eunek tugul, ak kochoot muguleldab chi age tugul:

⁸ ak kotoptobenso; ak konam ichek ng’woninwek ak arogenosiek; nyoru ng’wanindo ko u kwondo ne amei moet: ak kokwong’e age age; ak koigei togochikwak togochikab liblibenetab mat.

⁹ Ogeero, nyonei betutab Jehovah, ne korom, koboto nereknatet ak neregek che ng’wonen; si kobiit koyai emet koguber, ak kong’em kiptengeginik koges eng’ yoto.

¹⁰ Amu ma kogonu kecheikab kipsengwet ak kecheikyik che iyumigei lapkeiyenywa: imenitu asista komachei kochor, ak ma koluu arawet agine.

¹¹ Ak abir ng’ony amu yaitiennyi, ak abir kiptengeginik amu tengektanywa; ak awong’u menotetab che mendos, ak anyeroti menotetab che imuisei.

¹² Ayae chito koek ne kicheng’ei kosiir tahabu che kororon, chito ne siirei tahabu che tililen che bo Opir.

¹³ Ayae anyun kipsengwetisiek kobotan, ak kitumdum ng’ony koistogei eng’ komostanyi, eng’ nereknatetab Jehovah ne bo lugosiek, ak eng’ betutab neregekyik che ng’wonen.

¹⁴ Ak koweekyigei chi age tugul bikyik ko u cheptirgichet ne kionei, ak ko u kechirek che maiyumi chi, ak komwei chi age tugul kwo emennyi.

¹⁵ Kitoorei age tugul ne kinyoru; ak kibare rotwetab chok age tugul ne kinamei.

¹⁶ Kitonatoni lagokwak kogeerei; kiluulei gorikwak, ak kesuub osotikwak.

¹⁷ Ogeero, ang’eeti Medik koba kobargei ak ichek, che maiiti feda kole kiy, ama boiboitune ichek tahabu.

¹⁸ Ak kotonaton kwangokwak murenik; ama tinyei rirge eng’ che kisichei; marire lagok.

¹⁹ Ak ko u ye kiigabui Kamuktaindet Sodom ak Gomora, koigeitu noto Babulon, ne inendet ko torornatetab bounatosiek, ne kororonindab menotetab Kaldeik.

²⁰ Ma komenyei bik kogeny, ama menyei chi kong’eete ibinda agoi ibinda: ama teechei Marabuk emaisiek eng’ oloto; amaiyagisie oloto mestowek.

²¹ Ago tebe oloto tiong’ik che bo ong’atet; ak konyi gorikwak tiong’ik che irigendos: menyei oloto tiong’ikab songolik, ak kourerense oloto kwesik.

²² Ak koteiyo suik eng’ irimoikwak, ak koteiyo lelwek eng’ gorikwak che kororon che bo laitorinik: ak kagorik betunnyi, ama ketesei betusiekyik.