ISAIAH 11 - BUKUIT NE TILIL

Tugukab Tamirmiriet che kigochin Mesia koboisie

¹ Ak komong’une temet oretab Jesii, ak koi logoek temet ne biitune tigitikyik:

² ak kotebe inendet Tamirmirietab Jehovah, tamirmirietab ng’omnatet ak kaguiyet, tamirmirietab kiruoget ak kimnatet, tamirmirietab naet ak kaiyweisiet ne kiywei Jehovah.

³ Ak komi boiboiyennyi kaiyweisiet ne kiywei Jehovah: amairuochi ko u ye keerei, ama kerei kong’ ko u ye kasei;

⁴ ago iruoksechin kibananok eng’ imanda, ak koger kong’ che taloen che bo ng’ony eng’ imanda: ak kobir ng’onyuni eng’ kiroktab kutinnyi, ak kobare kiptengeginik kabusennyi.

⁵ Ak egu imanda birenet ne rategei, ak koek kayanet ne kiyani birenet ne rategei.

⁶ Ak kotebi suiyot koboto aruetab kechir, ak koruiyo cheblanget ak aruetab ng’oror; ak koruiyo moita ak ng’etundo barnotiot ak ne akwai; ak kokweri ichek lakwet ne ming’in.

⁷ Ak koaget teta ak tiondo ne u keerit; ruitos moekwak tugul: ak koam ng’etundo suswek ko u teta.

⁸ Ak kourerene lakwet ne reriei keringetab erenet, ak konde lakwet ne kageluge eunnyi kebenetab erenet.

⁹ Ma ito kiy chi anan kong’emis eng’ tulwennyu tugul ne tilil: amu nyiiei ng’ony naetab Jehovah ko u ye nyiiei beek nyanjet.

Koweeksei Israel ak Juda eng’ katerteret, kobunu ole kiga kiluulji

¹⁰ Ak cheng’ei bororiosiek eng’ betunoto tigitiotab Jesii, ne tononi koegu songolietab bik; ak egu torornatet ole imuung’e.

¹¹ Ak eng’ betunoto koyogoito Kiptaiyat eunnyi kogeny ne bo aeng’, kosor bikyik che tun ng’etu, eng’ Asuria, ak eng’ Misri, ak eng’ Patros, ak eng’ Kus, ak eng’ Elam, ak eng’ Sinar, ak eng’ Hamat, ak eng’ emotinwek che mi ngegusiek.

¹² Ak kolumda songoliet agobo bororiosiek, ak koyum che kigitimda che bo Israel, ak koyum che kiyesta che bo Juda eng’ luukwek ang’wan che bo ng’ony.

¹³ Ak koistogei ng’et kondab Epraim kogeny, ak keisto ichek che inyalili Juda: ak maamei ng’etkong’ Epraim agobo Juda, amainyalili Juda Epraim.

¹⁴ Ak kobokyi tigigoikab Pilistik eng’ cherongo; ak koluul ichek tuwai bikab kong’asis: chuulei eunekwak kogirinda Edom ak Moab; ak kogas it ichek lagokab Amon.

¹⁵ Ak kong’em Jehovah kowong’ ng’elyeptab nyanjetab Misri; ak kotwaitwai eunnyi kotokyi Ainet eng’ usonennyi ne beelsei, ak kobir kobiitune ainosiek tisabu, ak kogochi bik kolanda kolaagoti kweonik.

¹⁶ Ak kobiit oret ne o ne bo bikyik che tun ng’etu eng’ Asuria; ko u ye kimi agobo Israel eng’ betut ne kitogosu komong’une emetab Misri.