ISAIAH 1 - BUKUIT NE TILIL

Tengektab Israel ak birennyi: otisiet ne ma bo iman ak ne bo iman

¹ Ng’ang’utietab Isaia weritab Amos, ne kigeer agobo Juda ak Jerusalem, eng’ betusiekab Usia, Jotam, Ahas ak Hesekia, laitorinikab Juda.

² Ogas, ee kipsengwetisiek, ak oeb it, inye ng’ony, amu kagotwek Jehovah, kole: kiagu lagok, ak kianet, ak kigongelelja.

³ Ingen eito chitab kobo, ak kongen sigiriet biutab kiptaiyandennyi: ago manaei Israel, amaibwati bikyuk.

⁴ Bwa, bororiet ne yaei tengekto, bik che laei yaitiet, iyotetab yaikab yaitiet, lagok che yaei ng’emisiet: kigometo Jehovah, kigosas Inendet ne Tilil ne bo Israel, kigotoiyegei kochuchuigei.

⁵ Amu nee si kota kebirok, kot obistoe mising’ kosiir? Miani metit komugul, kigotanui muguleldo komugul.

⁶ Mami ole sobei koboch keldebesiet agoi metit; ago tinyei ng’otobosiek, ak kanerutik, ak mook che inenderi: ma kituch, ama kirat, ama kinur eng’ mwaita.

⁷ Kigoguber emeng’wong’; kigebeel nganasokwok; ibokyin toek emeng’wong’ ogeere, ak kogoguber, ko u ne kogong’em toek.

⁸ Ak kigebagakta cheptab Sion ko u keriet eng’ mbaretab sabibuk, ko u keriet eng’ mbaretab ngwek, ko u nganaset ne kigiyiem.

⁹ Nda kima bagakwech Jehovah ne bo lugosiek ng’etunenik che ng’ering’ mising’, ta kiga keige Sodom, ak ta kiga keige Gomora.

¹⁰ Ogas ng’olyotab Jehovah, okwek bounikab Sodom; oepchi it ng’atutietab Kamuktaindennyo, okwek bikab Gomora.

¹¹ Tilei nee eng’ ane chang’indab tiseiywekwok? Mwaei Jehovah. Kigonyiia kagochinoik che bo beelset che bo mengichik, ak sunetikab tuga che bootin; ama baibaitune korotikab kirugik, anan ko che bo arekab kechir, anan ko che bo kwesik.

¹² Ye obwa tainnyu, ko ng’o ne kimagenak kiito, si otiech seremusiekyuk?

¹³ Amatata oibu kagochinoik che matilei kiy; aweche nyamdutik che kibeelei; ma amuchi amuita agobo igorwekab arawet ne kaleel, ak sabato, ak kuursetab tuiyosiek - yaitwogik choto, koboto tuiyetab kaming’inetab ge.

¹⁴ Wechei sobondanyu arawekwok che kaleel ak igorwekwok che kiging’at: inyalila tuguchoto; kaang’et eng’ laetab tuguchoto.

¹⁵ Ak ye oiite eunekwok, aung’enok konyekyuk: ee, ye osa eng’ sautik che chang’, ko magase: nyiitat eunekwok korotik.

¹⁶ Ounge, otililge; oiste yaitietab boisionikwok eng’ tainnyu; osisye, amatata oyai yaitiet:

¹⁷ onetge oyai ne mie; ocheng’ kiruoget, otoret che kisastoe, obesiechi ng’alek ne matinyei kwanda, ong’alaldochi mosoget.

¹⁸ Obwa anyun, keng’alal, mwaei Jehovah: agot ngo biriren tengekwogikwok, koleelagitu ko u teluchi; agot ngo biriren mising’, koigeitu kororikab kechirek.

¹⁹ Ngot ochame ak ogase it, oame anyun akwaindab emet:

²⁰ ago ngot oesie ak ongelelse, kebarenok rotwetab chok: amu kagomwa nito kutitab Jehovah.

²¹ Kaegundo ano chepkugoniot nganaset ne ko bo iman, ne kotinyei kiruoget ne bo iman! Komenyei imanda nganasanato, ago nguno komi rumik.

²² Kigoigei fedaisieguk michikyigek che kigenendoe feda, kigeburukto divaiguk beek.

²³ Ngelelik bouniguk, ak ko choronokab chorik; chamei age tugul tugukab kagaigaet, ak kosuboti tuguk che kigeerjin: maibesiechin ne matinyei kwanda, ama kiipchin ichek ng’alekab mosoget.

²⁴ Mwaei anyun Kiptaiyat, Jehovah ne bo lugosiek, Inendet ne bo Kamuktaet ne bo Israel, kole, Haa, anyoru kagaigaet eng’ bunikyuk, ak ayoktochige mugetut eng’ bunikyuk:

²⁵ ak atokyin eunnyu, ak aunde simdang’ung’, ak aiste kibatiniguk tugul:

²⁶ ak aweegu kiruogiguk ko u eng’ tai, ak aweegu kotigoniguk ko u eng’ tai: ye ibata noto keguurenen Nganasetab Imanda, nganaset ne kiyani.

²⁷ Tun kitiachi Sion eng’ kiruoget, ak kitiache eng’ imanda bikyik che sigu.

²⁸ Ago tun biitu ng’emisietab bistoik ak ne bo kiptengeginik eng’ betut agenge, ak tun kigesu che metoi Jehovah.

²⁹ Amu ililandos ichek amu ketik che kiomache, ak kitewerak agobo mbarenik che kiolewen.

³⁰ Amu oigeitu ketit ne yaamdos sogekyik, ak mbaret ne matinyei beek.

³¹ Ak koigei che kimen katanisiek che arurendos, ak koigei boisiennyi mat ne iteri; ak kolalyo tuwai, ama biitu ne imisi.