HOSEA 8 - BUKUIT NE TILIL

Saetab kanamonik eng’ Israel, ak birenywa

¹ Kuut iriaget. Nyonjin gotab Jehovah ko u kipsichit: amu kigobistoe ichek kayomisennyu, ak kongelelji ng’atutikyuk.

² Tun rirjina kole, Kamuktaindennyu, kingenin achek Israel.

³ Kigometa Israel kit ne ki mie: isubi bunyot inendet.

⁴ Kigonde laitorinik, ago ma teebena; kigonde bounik, ama anai: kiyachigei kanamonik eng’ fedaisiekwak ak eng’ tahabusiekwak, si kobiit keisto.

⁵ Kigometo moitang’ung’, ee Samaria, kagolalyo neregekyuk agobo ichek: tianitu si koek bik che matinyei tengek?

⁶ Amu kibunu nito Israel; kiyaei musogindet, ama Kamuktaindet: ee, kitonatoni moitab Samaria.

⁷ Amu kolei usonet, ak kesei kipchurjuriet: matinyei bek che tonondos; maiitos itikab bek; ngot koiiyo, koamei kipsagarek kotarei.

⁸ Kigelugui Israel: mi ichek nguno kwenutab bororiosiek ko u teret ne ma kotilei kiy.

⁹ Amu kitogosta koba Asuria, ko u sigiriet ne bo timin ne mi inegei: kial Epraim chamanik.

¹⁰ Ee, agot nganda alei eng’ bororiosiek, ayumi anyun ichek; ak kotoi kong’ering’itu amu lautietab laitoriatab bounik.

¹¹ Amu kigotes Epraim kapkorosusiek si koyae tengekto, kigoek kapkorosusiechoto tengek eng’ inendet.

¹² Agot nda asirjini inendet ng’atutikyuk eng’ konetisiosiek elfusiek taman, kiiti choto kele tugun che tounen.

¹³ Ye enyei ichek tiseiywekab kagochinoikyuk, kogoitoi banyek ak koamei; ago mataachei Jehovah choto: ibwati anyun inendet tengektanywa, ak koiityi biret amu tengekwogikwak; weekyingei Misri.

¹⁴ Amu kigoutie Israel Yaindennyi, ak koteech gorikab laitorinik; ak kigotes Juda nganasok che ng’ototin: ago ayokyini mat nganasokyik, ak kobeel irimoikyik.