HOSEA 7 - BUKUIT NE TILIL

¹ Ye kata amache asoob Israel, kotook anyun tengektab Epraim, ak yaitietab Samaria; amu boisie lembechek: ak kwo orit chorindet, ak ng’emisiei lugetab rebik eng’ sang’.

² Ama ibwati eng’ mugulelwekwak kole abwati yaitienywa tugul: yiemei ichek anyun boisionikwak; mi tainnyu choto.

³ Iboiboi laitoriat eng’ yaitienywa, ak koboiboi bounik eng’ lembechekwak.

⁴ Ichek tugul ko bik che yaei ibetab ge; u kapkoima ole ilaali beelindetab makatinik; maiyuokyin mat koboch kokwanykwanyi makatiat agoi koguut.

⁵ Kieeiso bounik kot kobogityo mising’ eng’ maiyek, eng’ betutab laitoriandennyo; kichuul eunnyi koboto chotik.

⁶ Amu kigochob mugulelwekwak koigei kapkoima, kota kosaptoi ichek: ruei beelindetab makatinik kemout komugul; lalei karon ko u mat ne liblibeni.

⁷ Beelei bich ichek tugul ko u kapkoima, ak koamei kiruogikwak; kigobutyo laitorinikwak tugul: mami eng’ ichek ne kuura.

Berberindab Israel agobo ng’alekab emet

⁸ Buruchigei Epraim ak bororiosiek; Epraim ko makatiat ne ma kiwechwech.

⁹ Kigoam kipsagarek kimnatennyi, ama naei, ee, mi kalwalek alage yu, komi alage yun, eng’ inendet, ama naei.

¹⁰ Ak baoriani menotetab Israel eng’ tainnyi: agot ngo u noto ko ma weekyigei Jehovah Kamuktaindenywa, anan kocheng’ inendet eng’ chuto tugul.

¹¹ U Epraim cheptuget ne berber, ne matinyei kaguiyet: kuurei Misri, bendi Asuria.

¹² Ye ba, aiitochi ichek mestennyu ne u regereiywot; atururu ko u taritikab barak: atigoni, ko u ye kigogas tuiyenywa.

¹³ Bwa eng’ ichek! Amu kigoombeniot kometa: ingonyonji ichek ng’emisiet! Amu kigongelelja: agot nganda amache atiach ichek, ko kigomwa kora lembechek agobo ane.

¹⁴ Ama rirja eng’ mugulelwekwak, ago iteitos eng’ itogusiekwak: iyumegei agobo bek ak divaik; ingeleljina.

¹⁵ Agot nganda kianet ichek ak agimit eunekwak, kochobei yaitiet agobo ane.

¹⁶ Weechigei, ago maweekyingei inendet ne mi barak; u kwanget ne ma litit: kibarei bounikwak eng’ rotwetab chok amu neregekab ng’elyebwekwak: egu nito chotisienywa eng’ emetab Misri.