HOSEA 6 - BUKUIT NE TILIL

¹ Obwa, keweekyige Jehovah: amu kigogererech ak konyaech; kigobirech ak inyoech.

² Isoobech ye ibata betusiek aeng’u: ak kong’eetech eng’ betut ne bo somok, ak kesopche eng’ tainnyi.

³ Ongenai anyun, ongetes tai kenai Jehovah; mong’u iman ko u ye eechei: ak nyonjinech ko u ropta, ko u ropta ne bo let ne ibisi ng’ony.

Komuruonigei Epraim ak Juda, koboto laitoriat ak bounik

⁴ Ee Epraim, ayaun nee? Ee Juda, ayaun nee? Amu u mieindang’wong’ boldet ne bo karon, ak ko u rewot ne sib kobetei.

⁵ Kiawai anyun ichek eng’ maotik; kiabare ichek ng’alekab kutinnyu: ak u kiruogutiguk lapkeiyet ne mong’u.

⁶ Amu amache rirenetab ge, mamache tiseiywot; ak amache naet konai Kamuktaindet kosiir kagochinoik che kibeelei.

⁷ Ago kigobistoe ichek kayomiset ko u Adam: kigoberbera eng’ oloto.

⁸ Gilead ko nganasetab ichek che yaei tengekto, kigimuruon eng’ korotik.

⁹ Ko u ye sapchin lugosiekab rebik chi, ko u noto kweanetab tisiik, barisioti eng’ oret ne tokyingei Sekem; ee, kigoyai yaitiet.

¹⁰ Kiageer kit ne samis eng’ gotab Israel: mi kugoinatet, Epraim: kiging’wanit Israel.

¹¹ Ee Juda, mi kogeny kesisiet ne kigeng’atun, ye tun amutu kogeny bikyuk che kigeluul.