HOSEA 4 - BUKUIT NE TILIL

Ng’alek che ting’egei Jehovah ak Israel

¹ Ogas ng’olyotab Jehovah, okwek lagokab Israel: amu ting’e Jehovah ng’olyot bik che menyei emet, amu mamitei imanit, anan rirenet, anan naet ne bo Kamuktaindet eng’ emet.

² Mami kit age kobate chubisiet ak lembechek, ak rumisiet, ak chorset, ak ibetab ge; tesoksei, ak isubegei rumisiet.

³ Rirei anyun emet, ak nyaluli age tugul ne menyei oloto, koboto tiong’ikab timin ak taritikab barak; ee, kiistoi agichek njirenikab nyanjet.

⁴ Ago amat kotiiyo chi eng’ choto, anan koger kong’; amu u biguk ichek che ibeligei ak tisiindet.

⁵ Ago ibuti bet, ak obutosi koboto maotiot kemoi; ak abar komet.

⁶ Kigeng’em bikyuk amu matinyei naet: amu kiiesie naet, aesioin agane, si ma iegu tisiindet eng’ ane: amu kiiutie ng’atutikab Kamuktaindeng’ung’, autie agane lagoguk.

⁷ Ko u ye kitesak, ko u noto kitesak koyaiywa tengekto; awale torornatenywa koek tewernatet.

⁸ Baegei ichek tengektab bikyuk, ak koboiboitune yaitienywa.

⁹ Ak kit ne u eng’ bik, ko u noto eng’ tisiindet: ak abire ichek amu ortinwekwak, ak ayaakyi boisionikwak.

¹⁰ Ak koamisiei, ama biyong’dos; yaei kugoinatet, ama tesoksei: amu kigometa koepchi it Jehovah.

¹¹ Istoi kugoinatet ak divaik ak divaik che leelach, kaguiyet.

¹² Somei bikyuk kiruoget eng’ ketik, iborjin ichek siarinywa: amu kiimaas ichek tamirmirietab kugoinatet, ak kigoba koyai kugoinatet, kometo Kamuktaindenywa.

¹³ Enyei tiseiywek eng’ tulonok barak, ak kobeelei nyamdutik eng’ tulonok, eng’ kelutab ketik, ak ketik alak che u siliboik, ak ketik alak che ter, amu mie uruenywa: yaei anyun tibikwok kugoinatet, ak koyai murerenikwok ibetab ge.

¹⁴ Mabire tibikwok ye yaei kugoinatet, anan murerenikwok ye yaei ibetab ge; amu mastoi icheget koboto che yaei kugoinatet, ak koenyei tiseiywek koboto chepkugonik: ak kobutyo bik che maiguitos.

¹⁵ Agot ngiyae inye Israel kugoinatet, ko mat koyai Juda; amobwa Gilgal, anan otogoste Bet-aben, anan oyosie ole, Ko u ye sobei Jehovah.

¹⁶ Amu kigongelel Israel, ko u roriat ne uui met; baei Jehovah anyun ichek ko u aruetab kechir eng’ ole baraa.

¹⁷ Kigonamgei Epraim ak kanamonik; bagakte inegei.

¹⁸ Kigomindililitu tugukwak che eei: yaei kugoinatet kotugul; chamei bounikyik tewernatet mising’.

¹⁹ Kagotuch usonet inendet eng’ kebebaikyik; ak ililandos amu tisieywekwak.