HOSEA 3 - BUKUIT NE TILIL

Kotunisiei Hosea kogeny

¹ Ak kilenja Jehovah, Ui kogeny ak icham kwondo ne chamat eng’ choruennyi, ak ko chepkugoniot, ko u ye chamei Jehovah lagokab Israel, agot nganda weekyingei cheptalelisiek, ak kochamei makatinikab sabibuk che yaamnyotin.

² Kiaal anyun kwonyoto eng’ fedaisiek taman ak mut, ak homer agenge ne bo sairik, ak kebebertab homer ne bo sairik:

³ ak kialenji, Itebye ko i nenyu, eng’ betusiek che chang’; meyae kugoinatet, amat iegu osotiotab chi age tugul: si ayai ko u noto agane eng’ inye.

⁴ Amu tebyei lagokab Israel betusiek che chang’ ama tinyei laitoriat, ama tinyei bounindet, ama tinyei tiseiywot, ama tinyei toloita, ama tinyei epod anan terapik:

⁵ ye ibata koweek lagokab Israel, ak kocheng’ Jehovah Kamuktaindenywa, ak Daudi laitoriandenywa; ak kobwanji Jehovah ak mieindanyi eng’ kaiyweisiet eng’ betusiek che bo let.