HOSEA 2 - BUKUIT NE TILIL

¹ Omwachi ng’etab kametwagikwok olenji, Ami; ak omwachi chepkametwagikwok olenji, Ruhama.

Kiboru Israel ne ma namgei ak Jehovah

² Ogaigai komet, ogaigai; amu inendet ko ma osotiondennyu, ama a manong’otiondennyu: ak ingometo kugoinatosiekyik che mi togennyi, ak ingometo ibetab ge ne mi tegennyi;

³ si mareegune ngoroikyik, ak achuunde kotebi ach ngor, ko u betut ne kigisichei, ak ayai inendet koek ong’atet, ak agochi inendet koigei emet ne yaamat, ak abare melelda:

⁴ ee, marire lagokyik; amu icheget lagokab kugoinatet.

⁵ Amu kiyaei kamet kugoinatet: kiyai inendet ne kimanachi ichek, tewernatet: amu kimwa kole, Asuboti chamanikyuk, che kona amitwogikyuk ak beekyuk, koboto kororikyuk che bo kechirek, ak mabutekyuk, mwanikyuk ak tuguk che aee.

⁶ Keer anyun-o, ayieme oreng’ung’ katok, ak ang’ot inendet si manyor ortinwekyik.

⁷ Ak kosubot chamanikyik, ago manyoru ichek; ak kocheng’ ichek, ago manyoru: yeityo komwa kole, Kaweekyige manong’otiondennyu ne bo tai; amu kiagaigai eng’ betusiechoto kosiir nguno.

Kebirei Israel amu ma namgei ak Jehovah

⁸ Amu ma nai kole ane ne kiagochini bek, ak divaik, ak mwanik, ak atesyi feda ak tahabu, che kiyae Baal.

⁹ Aweechi anyun bekyuk eng’ betusiekyik, ak aweech divaikyuk eng’ kenyisiekwak, ak arebe kororikyuk che bo kechirek ak mabutekyuk che kota tugegei.

¹⁰ Ak ang’anye tewernatennyi eng’ taitab chamanikyik, ama biitu chi ne soru inendet eng’ eunnyu.

¹¹ Ak agesu kogeny boiboiyennyi, igorwekyik, ak betut ne kaleel arawet, ak sabatosiekyik, ak tuiyosiekyik tugul che kiging’at.

¹² Ak ang’em ketikyik che bo sabibuk, ak mogoonikyik, che kigomwa kole, Chu ko tuguk che kialena chamanikyuk: ak ayai tuguchoto koek osnet, ak koam tiong’ikab timin.

¹³ Ak aipchi inendet biret agobo betusiekab Baalik, che kobeeljin nyamdutik; ye kilelesanjinegei munaokyik koboto tugukyik che bo lelesta, ak kwo kosubot chamanikyik, ak koutiena, mwaei Jehovah.

Kotuni Jehovah Israel kosgeny

¹⁴ Noto anyun, ogeero, agaigai inendet, ak amut inendet kwo ong’atet, ak amwachi ng’alek che agaigae.

¹⁵ Ak agochi inendet mbarenikyik che bo sabibuk eng’ oloto, ak agochi inendet atebwetab Akor, koek kurgetab kamang’unet; ak koyanwa eng’ oloto, ko u eng’ betusiekab ming’inatennyi, ak ko u eng’ betut ne kimong’u kotogosu eng’ emetab Misri.

¹⁶ Ak iguurena eng’ betunoto, Isi, mwaei Jehovah; ama iguurena Baali.

¹⁷ Amu aistoi kainaikab Baalik eng’ kutinnyi, ama kibwati kogeny kainaikwak.

¹⁸ Ak ayai arorutiet eng’ betunoto agobo ichek koboto tiong’ikab timin ak taritikab barak, ak tuguk che ichuutegei ng’ony: ak airi kwanget ak rotwetab chok, ak aiste luget eng’ emet, ak agochi koruiyo eng’ chametab ge.

¹⁹ Ak achob ale atunin koigeny; ee, achobe atunin eng’ imanda, ak eng’ kiruoget, ak eng’ chamnyet ne tala, ak eng’ rirenosiek.

²⁰ Achobe atunin eng’ imanda: ak inai Jehovah.

²¹ Ak tun awolu eng’ betunoto, mwaei Jehovah, awoljini kipsengwetisiek, ak kowolji ichek ng’ony;

²² ak kowolji ng’ony bek, ak divaik, ak mwanik; si kowolji choto Jesreel.

²³ Ak agoljige inendet eng’ emet; ak arire inendet ne kima kirire; ak alenji ichek che kima ko bikyuk, O bikyuk; ak kole, I Kamuktaindennyu.