HOSEA 14 - BUKUIT NE TILIL

Kigoigoi Israel koweekyigei Jehovah

¹ Ee Israel, weekyige Jehovah Kamuktaindeng’ung’; amu kiibut eng’ tengektang’ung’.

² Ib ng’alek, ak iweekyige Jehovah: ilenji inendet: Iste tengekwogik tugul, ak itaach che miach: kigoitoi anyun kagochinetab kutuswekyok ne kata kigoitoi kirugik.

³ Masoruech Asur; magilanye mbartanyisiek: ama kelenjini kogeny boisionikab eunekyok, O cheptalelisiekyok: amu nyorunenen rirenet ichek che matinyei kwanisiek.

Korire Jehovah bikyik

⁴ Asoobi kachuchugeng’wong’ bo ge, achame ichek mising’: amu kogoistoegei inendet neregekyuk.

⁵ Aigeitu rewot eng’ Israel: yiei inendet ko u taptet ne kararan, ak kowakta tigitikyik ko u Lebanon.

⁶ Iwaktoi temenikyik, ak koigei emdit kororonindanyi, ak koigei siptanyi Lebanon.

⁷ Weeksei icheget che menyei uruennyi; soptos ko u bek, ak koyiei ko u ketitab sabibuk: igeitu ng’uunennyi ne bo divaikab Lebanon.

⁸ Tun mwaei Epraim kole, Ta keting’ege nee kogeny ak kanamonik? Kaawolu, ak ageer inendet: a u biribiret ne tuon; bunwa logoeguk.

⁹ Ng’o ne ng’om, si koguiyo tuguchuto? Ng’o ne utat, si konai tuguchoto? Amu lititen ortinwekab Jehovah, ak bendote che bo iman ortinwechoto; ago ibutyin oloto bistoik.