HOSEA 13 - BUKUIT NE TILIL

Nyoru Epraim biret amu saennyi ne bo kanamonik

¹ Ye kingong’alal Epraim, kobiit botanet; kiitororgei eng’ Israel: ago kime ye kiingelel eng’ Baal.

² Ak yaei nguno ichek tengekto kosiir, ak koyachinegei fedaisiekwak kanamonik che kitanyi, kiyai kanamonik ko u naenywa, bo choto tugul boisietab kitang’ik: mwaei agobo tuguchoto kole, Ingong’utut moek bik che eng’sei.

³ Kergeitu anyun ak boldetab karon, ak rewot ne sib kobetei, ak ko u metetek che ibei kipchurjuriet eng’ ruanyut ne kiborse, ak ko u iyeto ne mandoe soiyet.

⁴ Ago, a Jehovah Kamuktaindeng’ung’ koboch emetab Misri: amecheng’jige cheptalelit ne ter, kobatena anege, ama mi yetindet age kobatena.

⁵ Kianain eng’ ong’atet, eng’ emetab kemeut ne o.

⁶ Kibiyong’so ko u kit ne ki u ole kiagete; kibiyong’so, ak kiitororgei eng’ mugulelwekwak: kigoutiena anyun.

⁷ A u anyun eng’ icheget ng’etundo: asapchini eng’ oret ko u cheblanget:

⁸ kituitosi ak ichek ko u tiondo ne u keerit ne kagibare arekyik, ak agerer kwambelelietab mugulelwekwak: ak agesu ichek eng’ yoto ko u ng’etundo; tonatoni tiondab timin ichek.

⁹ Ng’emisieng’ung’ nito, ee Israel, amu igirindaa, igirindoi toretindeng’ung’.

¹⁰ Mi ano anyun laitoriandeng’ung’, si kobiit kosorun eng’ nganasoguk tugul? Ak mi ano kiruogiguk, che kiimwa ile, Kona laitoriat ak bounik?

¹¹ Kiagonin laitoriat eng’ neregekyuk, ak kiaiste eng’ neregekyuk.

¹² Ratat yaitietab Epraim, konorat tengektanyi.

¹³ Bwanjin inendet arogenosiek che bo kwondo ne machei kosigis: inendet ko werit ne ma ng’om; amu kait betut ne ma nyoljin ko ta kotebe mo.

¹⁴ Atiachi ichek komong’ eng’ kimnatet ne bo kererit; asoru ichek eng’ meet. Ee meet, mi ano korotweguk? Ee kererit, mi ano ng’emisieng’ung’? Ma awale kabwatutikyuk.

¹⁵ Agot ngo nyor berurto inendet eng’ kwenutab tupchosiekyik, konyonei usonetab kong’asis, togosu kabusetab Jehovah eng’ ong’atet, ak koteny kondanyi ne bo beek, ak koteny kondametunnyi: luulei konoruetab tugukyik tugul.

¹⁶ Ibei Samaria ng’ogistanyi; amu kigongelelji Kamuktaindennyi: ibutos eng’ rotwetab chok; kitonatoni lagokwak, ak kegerer kwonyikwak che tamonosiek.