HOSEA 12 - BUKUIT NE TILIL

¹ Baegei Epraim usonet, ak kosuboti usonetab kong’asis: tesei kotugul lembechek ak ng’emisiet; ak koyomisegei koboto Asuria, ak keib mwanik koba Misri.

² Ibeligei kogeny Jehovah ak Juda, ak kobir Jakobo ko u ortinwekyik; yaakyin inendet ko u boisionikyik.

³ Kinam kwariatab ng’etab kamet komi mo; ak kitinyei kimnatet koboto Kamuktaindet ko kagoeet:

⁴ ee, kitinyei kimnatet koterter malaikaiyat, ak kiiterter: kirir, ak kosa inendet: kinyorji inendet Bet-el, ak king’alalwech eng’ oloto;

⁵ inendet Jehovah Kamuktaindet ne bo lugosiek; Jehovah ko kabwatennyi.

⁶ Iweekyige anyun Kamuktaindeng’ung’: rib rirenet ak kiruoget, ak igen Kamuktaindeng’ung’ kotugul.

⁷ Chemung’araindet inendet, mi eunnyi tuguk che kirogendoisie che bo ng’alset: chamei kosastais.

⁸ Ak kimwa Epraim kole, Iman, kaaegu magoriot, kaanyoru magornatet: matun nyoru ichek yaitiet ne ki tengekto, eng’ boisionikyuk tugul.

⁹ Ago a Jehovah Kamuktaindeng’ung’ koboch emetab Misri; taagonin kogeny imeny emaisiek, ko u eng’ betusiekab igorta ne kiging’at.

¹⁰ Kiang’alalji maotik, ak kiates ng’ang’utik; ak kiaboisie kalewenaik eng’ boisietab maotik.

¹¹ Tos tengekto Gilead? Ichek tugul ko tangoita; enyei kirugik eng’ Gilgal: ee, u kapkorosusiekwak karurugutik eng’ mbaret ne ibatat.

¹² Ak kimwechi Jakobo emetab Aram, ak kiotis Israel agobo osotiot, ak kiiyagis si kobiit konyor osotiot.

¹³ Ak kiimoong’ Jehovah Israel eng’ emetab Misri eng’ maotiot, ak kiribot maotiot inendet.

¹⁴ Kitagis mising’ Epraim: noto anyun tebe korotikyik inendet, ak koweekyi Kiptaiyandennyi inendet tewernatennyi.