HOSEA 11 - BUKUIT NE TILIL

Chamnyetab Jehovah ne ting’e bikyik agot nganda mastoi

¹ Kiachame Israel ko ta ko ming’in, ak kiaguur werinnyu komong’ eng’ Misri.

² Kingoguur ichek bichoto, kotes koistoegei: kieng’ji Baalik, ak kibeelji nyamdutik kanamonik che kigiwai.

³ Ago kianet Epraim kowendot; kiaganabate eng’ eunekyuk; ago kima nai kole kiasoobi ichek.

⁴ Kiachuutune ichek boroonikab chi, koboto rogoonikab chamnyet; ak kia u eng’ ichek icheget che istoi chogit eng’ tagilgilikwak, ak kiande amitwogik tainywa.

⁵ Maweekyingei inendet emetab Misri; ago egu Asuriaindet laitoriandennyi, amu kiesio ichek koweeigei.

⁶ Ak kobutyi rotwetab chok nganasokyik, ak koges temeleiywekyik, ak koam ichek, amu kiruogutikwak.

⁷ Kagobegechi bikyuk kochuchuigei kometa: agot ngo kuurso ichek koguurji ichek inendet ne mi barak, ko mabiitu ne itorori inendet.

⁸ Amuktoi ano ameten, inye Epraim? Amuktoi ano asorun, inye Israel? Amuktoi ano ayain iige Adma? Amuktoi ano ayain iige Seboim? Kagowalak muguleldanyu, kagorira mo.

⁹ Mayae koromnatetab neregekyuk, maweeksei ang’eme Epraim: amu a Kamuktaindet, ma a chi; Inendet ne Tilil ne mi kwenung’ung’: machute nganaset.

¹⁰ Bendoti ichek kosuboti Jehovah, ne boriseni ko u ng’etundo: amu boriseni inendet, ak kobwa lagok kobotanionu kobunu cherongo.

¹¹ Bwanei kobotanionu ko u taritiet ne mong’une Misri, ak ko u cheptuget ne mong’une emetab Asuria: ak agochi ichek komeny gorikwak, mwaei Jehovah.

Kemwau kogeny ng’alekab Jakobo

¹² Yiemena Epraim lembechek, koyiemena gotab Israel ng’alset: ago bounisiei Juda kora koboto Kamuktaindet, ak koyanat eng’ Inendet ne Tilil.