HOSEA 10 - BUKUIT NE TILIL

Kiruoget ne nyonjin Israel

¹ Israel ko ketitab sabibuk ne tuneni kot, ne yiei logoekyik: kigotes inendet kapkorosusiekyik ko u ole te chang’indab logoekyik; kigoyai ichek tolochik che kororon ko u ole te kororonindab emennyi.

² Pcheat muguleldanywa; tinyei ng’ogisto: butei Jehovah kapkorosusiekwak, ng’emei tolochikwak.

³ Mwaei anyun ichek nguno kole, Magitinye laitoriat: amu magiywei Jehovah; ak imuchi laitoriat koyaiywech nee?

⁴ Mwaei ichek ng’alek che bo buch, iyostos eng’ lembechek koyaei arorutik: bitei anyun kiruoget ko u ketit ne ng’wan eng’ mbaret ne ibatat.

⁵ Iyweisiei mising’ bik che menyei Samaria amu kanamonikab moekab Bet-aben: amu rirjin bikab emonoto oloto, koboto tisiikyik che kiboiboitune kanamwonoto bo moita amu torornatennyi ne kiga koistoegei.

⁶ Kiibei moato kwo Asuria koek kagochinet ne kiipchin laitoriat Jareb: nyoru Epraim tewernatet, ak ililanjin Israel kiruogennyi inegei.

⁷ Kiistoi laitoriatab Samaria, ko u ye kiistoi bugat eng’ beek.

⁸ King’emei kogeny komoswek che tororen che bo Aben, tengektab Israel: bitos katok ak katablelinik eng’ kapkorosusiekwak; ak kolenji ichek tulonok, Otuchech; ak kolenji tulonok che mengechen, Oluuljech.

Kesi Israel ng’emisiet amu tengektanyi

⁹ Ee Israel, kiiyai tengekto koboch betusiekab Gibea: kitononso eng’ oloto; si manam ichek boriet eng’ Gibea ne baregei ak lagokab tengekto.

¹⁰ Atigoni ichek ye kamach; ak koyumgei bororiosiek koborie, ye kagiratyi ichek bistaosiekwak aeng’.

¹¹ Epraim ko roriat ne kiginet, ne chamei kobor bek; ago kiasiirte eng’ kaatinnyi ne kararan: aganapchini Epraim chito ne lanyei; ibatisiei Juda, birei Jakobo tindinyekyik.

¹² Ogoljige eng’ imanda, oges eng’ rirenet; obalu mbareng’wong’: amu kait betusiek che kicheng’ei Jehovah, kot konyo ak korobonjok imanda.

¹³ Kiobat yaitiet, oges tengekto; kioam logoekab lembechek: amu kiimang’u oreng’ung’, eng’ chang’indab biguk che nyigonen.

¹⁴ Biitu anyun wasetab ge eng’ biguk, ak keng’em irimoiguk tugul, ko u ye king’em Salmon Betarbel eng’ betutab boriet: kigitonaton kamet koboto lagokyik.

¹⁵ Yaiywok anyun Bet-el ko u noto amu yaitieng’wong’ ne o: kibarei laitoriatab Israel ko kairir emet.